Ang suki ni Doroy

Taudtaod na si Doroy nga naglingkod nga nag-inusara sa usa ka lingkoranang semento nga nahimutang sa plasa. Nagkalo siyag itom ug nagdiyaket og maong ug may gisipitan nga usa ka clutch bag. Sa iyang tiilan nagpasad na ang mga upos sa sigarilyo.

Gitan-aw niya ang relo sa iyang bukton. Menus diyes para ala siyete na. Sa dili madugay moabot na ang tawo nga iyang gipaabot. Kuwarta na usab nga malabo kun mahiabot na ang tawo nga maoy iyang gikasabot nga mopalit sa shabu nga iyang dala nga gisulod sa clutch bag. Untop alas siyete ang ilang sabot nga mag-abot dinhi sa plasa.

Maoy pangita ni Doroy ang pagpamaligyag shabu. Wala siya’y trabaho. Dili siya gustong maghago ug magpatulo sa singot aron makasapi. Gusto niya nga makakuwarta sa labing sayon nga paagi busa maoy iyang gipili kining panapia-- ang pagbaligya sa gidiling drugas.

Niadtong miaging semana may tawong ginganlag Micko nga mipalit kaniya’g shabu. Duha lang ka gramo ang gipalit niini. Apan nahigalam tingali kay miusab man pagkontak kaniya. Ug niining higayona lima na ka gramo ang paliton ni Micko.

“Okey ang imong baligya, Bay,” nahinumdom si Doroy sa gisulti ni Micko kagahapon sa ilang panagkita. “Primera klase gyud. Lami. Nakagusto ko.”

“Basta akoy mobaligya, Bay,” matud niya nga nahimuot, “dili ka gyud magmahay. Dili ka mahinugon sa imong bayad. Mao bitaw nga daghan ang mopalit nako. Daghan nakog suki nga mga batan-on nga kasagaran mga estudyante.”

“Mao ba?” ni Micko. “Ugma, Bay, dad-i na sab ko. Lima ka gramo. Sa plasa ta magkita.”

“Seguro basta ikaw,” ni Doroy pa usab.

Paghagtok sa alas siyete sa kagabhion, nahiabot si Micko sa plasa. Miduol dayon kini kaniya.

“Nakadala ka?” Nangutana si Micko.

“Oo, uy,” mipahiyom si Doroy. “Nia sa clutch bag.”

Gitunol ni Doroy ang clutch bag ngadto kang Micko nga gidawat usab sa naulahi.

Giablihan ni Micko ang clutch bag. Ug iyang gisuling ang sulod niini ug miyangoyango siya. Unya, gibayran ni Micko si Doroy. Human madawat ni Doroy ang kuwarta, kalit nga gitionan ni Micko si Doroy nakalitan ug wala kalihok. Misiga ang iyang mga mata.

“U-unsay ipasabot niini?” Mikurog ang tingog ni Dory.

“Taga PDEA ko,” matud ni Micko. “Gi-eksamin namo sa laboratoryo ang napalit ko kanimo niadtong miaging semana aron usab makakuha pa akog dugang ebidensiya gikan kanimo. Namatud-an nga primera klaseng shabu kining imong gibaligya. Busa sa ngalan sa balaod gidakop ko ikaw.

Ug giposasan ni Micko si Doroy. Walay nahimo si Doroy. Wala siya magdahom nga mahulog sa mga kamot sa balaod. – Kataposan