Sugilanon - Tam-is ang panyawan

Nagtakilid ko paghigda sa among hawanan. Wa na ko modulog paghigda sa akong Mama sa sulod sa among kuwarto ning gabhiona. Di nako motutoy kaniya. Pait na kaayo ang atngal sa tutoy ni Mama! Gilutas na ko niya. Ngeee!

Gibutangan na niya'g panyawan ang iyang duha ka mga tutoy. Sus, pait na kaayo ang tutoy ni Mama Nancy! Gibati ko'g kahiubos nila ni Papa Ernie ug Mama Nancy. Si Papa gyud ang nangusog niining tanan. Sa miaging semana, nadungog nako ang ilang panagsulti.

"Nancy, sayes anyos na si Dodong, uy! Angay na siyang lutason!"

"Ernie, maluoy man ko ni Dodong, uy! Motutoy pa man  gud siya!"

"Mo-Grade One na siya sa sunod tingbukas-klase, Nancy! Butangi'g panyawan ang imong mga tutoy...!" ni Papa Ernie nga klarong nadungog gyud nako.

"Aw, ikaw gud, Ernie! Luoya baya ni Dodong, no? Pait ra ba kaayo ang panyawan...!"

Sa miaging adlaw, napanid-an ko si Pape Ernie nga may gidalang gamay nga sanga sa kahoy. Morag dakong gamot. Wa ko magdahom nga mao na diay kadto ang panyawan. Nakatuaw ko's kaugalingon nga mahinayon na gayud diay ang paglutas nako. Nakapanakla. Unsaon na lang niini nga gusto pa man gyud kong motutoy sa dughan ni Mama? Ahaka ning papa, uy!

Sanglit bugtong kong anak, nagdako nga gipasagdan lang ni Mama sa pagtutoy kaniya. Kanang uhawon ko sa paglad-ok sa iyang gatas, yatakyatakan ko lang ang mga bugas nga inalig-ig sa akong inahan diha sa among hawanan, samtang padayon siya nga nag-alig-ig sa ginaling mais. Magpasabak dayon ko niya, nunot ang pagtutoy sa iyang dughan. Bisan kanunay kong sungugon ni  Papa nga guwang na kuno ko ug angay na nga moundang sa pagtutoy, hiwian ko lang ang akong amahan. Padayon gyud ang akong pagtutoy kang Mama Nancy.

Wa gyud ko duawa sa katulogon ning gabhiona. Nasawod sa akong pandungog ang panagsulti nila ni Papa Ernie ug Mama Nancy sa sulod sa kuwarto. Mag-inagik-ik sila sa ilang katawa. Sukad ko malutas, si Papa na ang kanunay’ng makigdulog ni Mama sa sulod sa kuwarto.

Mitindog ko. Sa gingi sa bungbong namo nga sasang kawayan, gilili ko sila si Papa ug Mama sa sulod sa kuwarto. Nadan-agan sila sa kahayag sa among petromaks. Ngeeee! Kalain baya ni Papa, uy! Siya na ang mitutoy sa duha ka suso ni Mama! Gibangkong na. Naminaw ko sa ilang panagsulti.

"Pilyo gyud ka, Ernie! Di ba pait pa man ang panyawan nga gibutang sa atngal sa akong tutoy....!" gikan kang Mama Nancy nga ambot ngano nga mora man og misulirap ang iyang mga mata ug gipasagdan si Papa nga nagtutoy kaniya ug nagpiyong sab ang mga mata.

"Sus, tam-is ang panyawan alang nako...!" miiknat ang akong kilay sa nadungog gikan sa akong amahan. Tam-is kuno ang panyawan! Kiat kaayo ang mga kamot ni Papa nga mihukas sa daster sa akong inahan. Naghubo sab si Papa sa tanan niyang mga sapot. Ngeeee! Ahaka nilang Papa ug Mama uy!

Mibalik ko'g higda sa hawanan. Mitikungkong ko. Ang batan-on kong kaisipan, hilom nga naglagot kang Papa. Naglibog ko's akong nadungog sa akong amahan.

"Tam-is kuno ang panyawan...!" ug may katarungan si Papa sa iyang gibuhat kang Mama karong gabhiona. Wa tuyoa, napahit ko ang akong ngabil nga naghunahuna kang Papa Ernie. Kataposan