Intimate Moments

Buta ang gugma

Gula 5

Wala dayon ko makatubag sa pangutana ni Julius. Miduko ko dihang iya kong gitutokan. Dili ko makaharong sa iyang tinan-awan.

“Sorry kun personal ra kaayo ang akong pangutana, Jomelle,” niya pa.

“Okey lang,” nako pa. “Andam kong motubag sa imong pangutana.”

“Interesado sab kong masayod sa imong tubag.”

“May boyfriend ko sa una, si Benjie. Usa siya ka staff sa usa ka politiko dinhi sa Sugbu. Nahigugma ko niya. Pero wala magdugay ang among relasyon.”

“Ngano man?”

“Dili mi magkasinabot. Managlahi ang among baroganan sa mga butang ug panghitabo sa kinabuhi. Labaw sa tanan, mas gipalabi niya ang iyang trabaho kay kanako.”

“Nahigugma ka ba gyud niya sa tinud-anay?”

“Yes. Siya ang akong first love. Nagtuo kong molungtad ang among relasyon pero nasayop ko. Tingali, dili gyud mi alang sa usag-usa.”

“Husto ka. Tingali, dili siya ang gitawag nilag...imong soulmate.”

“Dili ko motuo nianang soulmate-soulmate. Para nako, si Benjie dili gyud mao ang lalaki nga gitagana sa Ginoo alang nako.”

Nahilom si Julius. Wala na siya motubay sa ulahi kong gisulti.

“Ikaw, Julius,” matud ko. “May asawa ka na ba?”

“Sobra ka na man sab,” ni Julius pa. “Ngano, minyo na ba gyud diay kong tan-awon, Jomelle?”

“Dili man. Gusto lang kong maneguro nga wala ka pay kabilinggan sa kinabuhi.”

“Ulitawo pa ko, Jomelle. Sa edad nga 29, pure ulitawo pa intawon ko.”

“Nganong wala ka pa man magminyo?”

“Tungod sa ambisyon nga mahimong usa ka abogado. Ug tingali, sama nimo, wala pa nako ikahibalag niadtong miaging panahon ang babaye nga gitagana sa Dios para nako. Pero karon, gikahimamat ko na ang maong babaye.  Jomelle.”

“U-unsay buot mong ipasabot?”

“I love you, Jomelle.” -- Sumpayan pa