May utlanan ang kangitngit

Nagpadayon ko sa pag-alagad sa hospital. Usa niana ka adlaw, wala ko damha nga mahilandig si Reuben, ang kanhi kong boyfriend, sa tambalanan nga akong gialagaran. Nahiagom siya sa aksidente sa dalan ug maayo gani kay dili kaayo grabe ang mga samad nga iyang nahiagoman. Ako'y iyang attending nurse busa nakahigayon kami sa pagpakigsultig dugay. Wala niya kalikayi ang paghisgot sa among kagahapon.

"Gamay ra gayod diay ang kalibotan kay nagkita man kita pag-usab," ni Reuben pa.

Wala ko motingog.

"Sumpayan nato ang naputol natong kagahapon, Kaycee," matud ni Reuben.

"Dili na ko angay nimo, Reuben," giingnan ko siya.

Unya gisuginlan ko siya nga sa dihang nagkalagyoay mi, ingon sa wala nay klarong direksiyon ang akong kinabuhi. Nakahuman man tuod kog eskuyla pero daghan kog salawayong buhat nga ako lang gihilom. Gitug-anan nako si Reuben nga nakabaton   kog sexual relation ngadto ni Murphy, Jimbo ug ni Dr. Suave.

"Pareho diay ta," ni Reuben pa.

Gitug-anan ko ni Reuben nga dihang nagkalagyoay kami, upat ka babaye ang iyang gikarelasyon. Pulos niya naangkon ang ilang pagka babaye. Apan wala mo-prosper ang ilang relasyon. Misangpot sa panagbulag ang tanan tungod kay nagpabiling ako ang gipitik sa iyang kasingkasing.

"Busa kun mosugot ka," ni Reuben pa, "ipadayon ta ang atong gugma."

Kinsa man kaha ko nga makabalibad sa lalaki nga maoy akong gihigugma? Misanong ko sa gusto ni Reuben. Ug dihang nakagawas na siya sa hospital, namauli dayon mi sa Sugbu. Nangatubang siya sa akong mga ginikanan ug nananghid nga magminyo na kami. Nagpasalamat ko nga wala nay pagsupak ang akong mga ginikanan. Mga propesyonal na kuno kami busa may kagawasan na kaming mo-decide alang sa among kaugmaon.

Nagpakasal dayon kami ni Reuben. Sa unang gabii human sa among kasal, gitagbaw namo ang among kaugalingon sa lawasnong kalipay. Sa pagbalik ni Reuben sa akong kinabuhi, nakaplagan ko ang utlanan sa kangitngit nga miulipon kanako. May direksiyon na ang akong kinabuhi. Andam ko nang kalimtan ang nightmare sa kagahapon. -- Kataposan