(Gula 50)
Kalit lang kong gikulbaan. Ngano man kaha nga gitutokan man ko ni Mama? May namatikdan kaha siya kanako nga ingon sa nakapahibulong kaniya? Nakapangutana ko niini sa hilom. Gipaspasan ko ang pagkaon.
“Nalipay ug excited na baya kami si Papa mo nga mogradwar ka na, Kaycee,” nagkanayon si Mama Marlinda. “Dili ba last semester na man karon nimo sa kurso nga imong gikuha nga nursing?”
“Oo, Ma,” laktod kong tubag. “Sa Marso puhon mogradwar na ko kun walay kakulian nga mahitabo sa umaabot.”
“Kun nagpadayon ka pa sa imong pagpakabuang niadtong Reuben, hayan dili ka gyud makagradwar. Maayo gani kay...”
“Ayaw na siyag hisgoti, Ma. Mahimo ba? Wala na siya. Dili na siya angay pang hisgotan. Total, natuman na man ang inyong gusto.”
“K-kaycee...?”
Gitiwas ko ang pagkaon nga nahibilin sa akong plato. Pagkahuman, gihipos ko ang akong mga kinan-an. Hugasan ko unta kini sa banggera apan miilog si Mama. Siya lang kunoy manghugas aron makapahulay na ko. Misulod na lang ko sa kuwarto.
Nanglabay ang mga adlaw. Nagpadayon ko sa pag-eskuyla. Gitingob ko ang akong panahon sa akong pagtuon. Wala na gyud kami magkita si Jimbo. Gituman niya ang iyang gipasalig nga dili na siya magsamok nako. Si Murphy sab, nagpabilin nga civil ang among tinagdan sa usag-usa. Midistansiya kog maayo niya.
Ingon sa mikilab lang ang panahon. Gradwasyon na. Natapos ko na gayod ang kurso nga akong gikuha. Human sa gradwasyon, nangandam dayon ko alang sa review para sa akong pagkuha sa nursing board exam nga ipahigayon nianang pagka Hunyo.
Sa dihang mi-take na ko sa exam, nag-ampo gyud ko ni Sr. Sto. Niño nga unta lamdagan niya ang akong hunahuna ug makatultol ko sa tukmang tubag sa mga pasulit. Gidungog gyud Niya ang akong pag-ampo kay usa man ko sa nakapasar.
“Mangaplay dayon kog trabaho sa Manila, Ma,” matud ko dihang nasayran na ang resulta sa pasulit. – Sumpayan pa