I can’t stop loving you

Hagbay ra untang daygan ni Osmundo sa nag-urus-uros niyang gugma si Miling pero nagpanuko lang siya tungod kay gitamod man sab god niya ang iyang ig-agaw nga si Merto nga utro pong nahigugma kang Miling.

Dili siya buot nga nganlan siya  ni Merto og way utang kabubut-on ug ingnon unya siya nga usa ka tawong mangingilog.

Una nga nag-ibid-ibid si Merto kang Miling. Ulahi na nga naghupo-hupo si Osmundo tungod kay bag-uhay pa man lang ugod siya niining dapita -- sa dapit ni Merto nga ginganlan og Sityo Bahog-ilok sa Brgy. Kulihad.

Mibakasyon lang si Osmundo dinhi sa maong sityo tungod kay gilaayan na kaayo siya didto sa ilang dapit -- sa Barangay Nagwakat. Gitak-an na siya didto kay wa na man gayuy babayeng misugot kaniya tungod kay notado na kaayo siya sa pagka daghag kabuang. Hilabihang bugoya niining Osmundo. Bisag unsa lang nga tinonto ang iyang gipanghimo.

Tungod kay taudtaod na mang nangaminyo ang mga igsuon ni Osmundo ingon man ang iyang mga ig-agaw, nakahunahuna siya nga mobakasyon sa dapit sa lain sab niyang ig-agaw nga si Merto.

"Gaw Mert," usa ka adlaw niana giingnan na gayud ni Osmundo si Merto. "Duna ta koy ikumpisal nimo."

"Unsa man kana, Gaw Mun?" nahibulong si Merto.

"Kining, duna lagi  ta koy gihigugmang babaye pero nagpanagana lang ko kay duna man sad guy na-in love niya nga suod sa akong kinabuhi."

"Kinsa man nang bayhana ug kinsa man sad nang lakeha?"

"Nagpanagana lagi ko, Gaw, kay maikog man gud ko sa maong lake."

"A, sultihi lang ko, Gaw, kay basin diayg makatabang ko nimo."

"Makatabang gyud kaha ka, Gaw, kon ingnon tika nga..."

"Nga unsa lagi, Gaw?"

Di na lang gyud unta ilahos ni Osmundo ang iyang buot ibutyag apan nahinaykan na man niya busa gidaygan na lang gyud niya ang iyang ig-agaw: "Ang maong babaye, Gaw, mao si Miling ug ang lalake ... ikaw!"

Gikulbaan si Osmundo pagkahuman niyag butyag kang Merto sa tanan apan nahilis lang sad dayon ang mao niyang kabalaka kay...

"Aw, unsa diay?"

"Unya wa ka masuko, Gaw?"

"Nganong masuko man ko, Gaw, nga dili pa man akoa ang kasingkasing ni Miling? Gawasnon pa man siya sa pagpili kun si kinsa ang lalake nga iyang higugmaon. Kana hinuon kun magtiayon na mi og imo siyang ibid-ibiran ... aw, magkatrokis gyud ta." Ligdong nga namulong si Merto.

Natugkad ni Osmundo ang pagka tawo sa iyang ig-agaw. Sa sinugdan maoy iyang pagtuo nga mobanghag kini ug mosudya kaniya kun iya kining sayran sa iyang gibati ngadto kang Miling. Pero karon nasuta nga ligdong diay’ng pagka tawo si Merto.

Gidaygan ni Osmundo si Miling sa iyang gibati...

"Sori kaayo, Mun, nga dili ko madawat ang imong gugma. Ang tinuod dugay na sad kong nahigugma kang Merto pero nagpanagana lang kog sugot niya kay nahadlok ko sa akong mga ginikanan. Mao ra bay ilang tugon nako sa didto pa ko sa Cagayan de Oro -- sa dayon kong anhi sa balay sa akong iyaan aron patabang-tabangon sa ilang negosyo, nga dili ko magpatakag panguyab. Pero kun dunay lalake nga sinsero ug desididong mangasawa anaa ra nako ang paghukom kay eksakto na man kuno ko sa edad," seryoso nga namulong si Miling.

"U-unya, Ling?" daw nahugno si Osmundo.

"Nakita ko ang katiunay sab sa imong gibati ngari nako. Pero naulahi ka lang. Akong natugkad nga nakagamot na sab ang akong gugma ngadto kang Merto. Busa pangita na la'g laing babaye nga ipuli sa akong dapit, Mun, kay kagabii ko pa gyud gidawat ang gugma ni Merto."

Morag gihiwa ang kasingkasing ni Osmundo. Nanamilit siya dungan ang pag-ingon: "Sige, Ling. Wa koy mahimo. Pero bisan og atua ka na sa mga kamot sa akong ig-gaw magpabilin ako nga mahigugma kanimo."

Sa iyang pagpauli, sa iyang paghiagi sa videokehan dihay mga  nanag-inom ug may lalake nga mikanta nga nakapasamot sa kangutngot sa iyang kasingkasing ... "I can't stop loving you..."

Wala kapugngi ni Osmundo ang pagpanglugmaw sa mga luha sa iyang mga mata. – Kataposan