Goodbye

Nagginukdanay sa puting balas sa beach resort sa Lapulapu city sila si Logane ug Cris. Unya naapsan ni Cris si Logane. Nangatumba sila sa balas. Nagkaligiray samtang naggakos. Unya ang ilang katawa mipatigbabaw sa palibot.

Nahilom sila. Nagtinutokay. Ug nag-akob ang ilang mga ngabil. Pagkahuman, mitindog si Logane. Milakaw sa baybayon. Gituparan siya ni Cris.

"Daw damgo lang ang tanan, diba, Cris?" Mikarat ang tutunlan ni Logane, may kaguol nga gibati. "Anugon. Maayo pag wa ta magkakita ug magkaila."

Nanghupaw si Cris. May pagbati nga buot pakigbatokan sulod sa iyang kasingkasing.

"Unta, apan ang panahon ang naghatag og dalan aron magkahimamat ta."

Kusog niadto ang ulan. Gikan si Logane sa unibersidad nga iyang gitunghaan. Kalit lang siyang nalipong ug natumba samtang naglakaw sa aseras. Nawad-an siya sa panimuot. Pagmata pa niya, diha na siya sa sulod sa usa ka kuwarto sa ospital.

"Naatol nga ako ang nakatabang nimo, Logane," matud ni Cris nga nakahinumdom sa nangagi. "Pagbuot sa Dios nga magkaila ta."

"Pagbuot ba sab Niya nga tagaan kog kagul-anan human sa kalipay sa atong panaghigugmaay?" May luha na sa mga mata ni Logane.

"Gitawag ako Niya, Logane. Ang akong kasingkasing makusganong misanong na sa Iyang Gusto." Miginhawag lawom si Cris.

"I love you very much, Cris." Mibakho og kusog si Logane. Giumod niya ang iyang nawong sa duha niya ka palad.

"I love you too, Logane. God knows that. But pagbuot sa kahigayonan nga adto gyod ako moalagad Kaniya."

Miginhawag lawom si Logane. Namahid sa iyang mga luha sa iyang mga mata.

"It's over na ba gyod, Cris?"  Your decision is final?"

Tumang kaluoy nanguhit sa kasingkasing ni Cris samtang nagtutok siya kang Logane. Mihuot ang iyang dughan. Ug mao na lay iyang nahimo ang paggakos og hugot kang Logane.

"I'm sorry, Logane, I’m very sorry nga gitagaan tikag kaguol."

Mitutok pag-ayo si Logane kang Cris.

"Bisag ikaw nasayod kun giunsa ko pagpaninguha nga ikaw lang ang gahinan ko sa akong kasingkasing. But I failed. Napakyas ko, Logane. Migawas ko sa seminaryo aron gahinan ka nako sa tanan kong panahon. Apan..." Wala usab makapugong si Cris sa iyang emosyon. Nanglugmaw ang iyang mga luha sa iyang kalimutaw.

Miduko si Logane. Miyaka sa balas. Ang iyang panan-aw didto sa lawod. Wala na siya maghilak. Apan ang tumang kaguol milakra sa iyang nawong. May lama pa sa luha ang iyang kaapingan.

"Please try to understand me, Logane."

Mitan-aw si Logane kang Cris. Dugay niyang gitutokan ang hinigugma.

"Nakasabot ko, Cris. Di ikaw para nako. Alang ka sa Dios. Di ko buot nga isipon nga kaagaw ko ang Dios sa imong gugma." Unya may nipis nga pahiyom nga mibathay sa mga ngabil ni Logane.

"Thank you, Logane. G-goodbye."

"Goodbye!"

Wala motan-aw si Logane sa pagtalikod ni Cris. Talikdan na siya niini kay mobalik na kini sa seminaryo. Nalubog na usab ang iyang mga mata sa iyang mga luha. – Kataposan