May utlanan ang kangitngit

Naghinuktok si Reuben sa akong atubangan. Pagkataudtaod, miatubang siya nako. Mitutok siya nako samtang gigunitan niya ang akong kamot.

"Nahigugma ka man kaha nako?" Tugob sa kaseryoso ang tingog ni Reuben.

"Gihigugma ko ikaw, Reuben," nako pa. "Pero unfair man usab tingali kon tungod lang niana imong pukanon ang akong kahuyang?"

Wala motingog si Reuben. Igo lang siya mibuhi og lawom nga panghupaw.

"Kon tinuod kang nahigugma nako, Reuben," matud ko, "motabang ka sa pag-preserve sa akong virginity hangtod sa unang gabii human sa atong kasal. Bahalag unsay imong buhaton sa ubang mga parte sa akong lawas, dili ko ikaw santaon. Basta kay ayaw lang gyod una hilabti kining usa ka butang nga akong giampingan."

Nakasabot tingali si Reuben sa  akong katarongan kay wala na man siya makiglantugi nako. Sukad niadto, ingon sa nasayod na si Reuben sa iyang limitasyon. Sa matag higayon nga magkabagat kami sa usa ka pribadong lawak sama sa iyang kuwarto, kutob ra gayod sa hagkanay ang among himoon. Wala na gayod siya mohimog attempt sa pagkutlo sa gihay sa akong kaputli.

Apan miabot ang panahon nga ingon sa inanay nang nakamatikod sila si Papa Amado ug Mama Marlinda nga may relasyon kami si Reuben. Usa ka higayon niana, nakit-an kami si Reuben ni Mama Marlinda nga nagkuptanay sa kamot. Gipakigsultihan ko ni Mama sa sekretong paagi mahitungod sa iyang nakita. Iya kong gipatug-an sa tinuod. Apan wala gyod ko motug-an nga may relasyon na kami si Reuben.

Namatikdan nako nga ingon sa wala motuo si Mama Marlinda sa akong gisulti nga managhigala lang kami si Reuben. Nagtuo gyod siya nga kon dili man nako boyfriend si Reuben, maoy mutual understanding na kaming duha. Pero hugtanon gyod nakong gipanghimakak ang iyang gipanulti.

Usa ka hapon niana, sa akong pagpauli gikan sa eskuylahan, naabtan ko sila si Papa Amado ug Reuben nga seryosong nagsultihanay. Naniid lang ko nila. Human sa ilang panagsulti, nakita ko si Reuben nga misaka sa taas sa balay nga masulub-on kaayo ang panagway. – Sumpayan pa