Buang man gud

Si Esyot ang gisaligan sa iyang igsuon para magbantay sa ilang usa ka igsuon nga dunay deperensiya ang utok. Sa eskuwelahan, mao ang gibuhat ni Esyot ang pagbantay niini ilabi na kun magbuhat og binuang. Dako gayod ang problema ni Esyot kay usahay,  mangita kinig gubot. Ang pait sa tanan kun motokar ang kabuang kay maglakawlakaw kini og magsayaw-sayaw sa dalan.

Daghan ang mokantiyaw niini busa sakitan si Esyot kay igsuon man god niya. Ug dili niya ikatugot nga binuangan kini sa ubang kabataan. Mao man gani nga usahay, iya na lang hangyuon ang ilang magulang nga paundangon kini pag-eskuwela. Kay sakitan si Esyot nga binuangan ang iyang igsuon.

“Esyot,  kinahanglan nga atimanon mo kanang imong igsuon kay bisan kun unsaon, igsuon mo kana,” pulong sa ilang kamagulangan nga igsuon nga mao ang naghatag sa ilang tanang panginahanglanon. “’Kinsa ang nasayod nga sa iyang paglakaw, makakaplag siyag bulawan ug mapuslan pa gihapon siya sa katilingban.”

“Sagdi lang kay atimanon ko siya,” pulong ni Esyot. “Galisngag lang ang ilong niana. Kun dili lang mapriso ang tawo, pastilan pagkanindot ibahog sa tilapia kanang bataa.”

Apan, naay panahon nga kaha dili sapoton ang igsuon ni Esyot. Maayo mosugot kun unsay isugo. Abtik kini mosag-ob sa tubig ilabi na kun suholan. Ang kanindot ra ba kay ang iyang dawaton tibuok piso tingali dili pa siya makaila sa hitsura sa singko pesos. Pero , sa panahon nga motokar ang pagkabuang, bisan kun unsaon pagpasabot, dili gayod mosabot. Mao kining dakong problema ni Esyot ug sa ilang kamagulangan nga mao ang naggasto sa tanang panginahanglan niini.

Usa ka adlaw, nagkapuliki si Esyot ug sa iyang igsuon nga duna lagi deperensiya ang pangisip. Ang gibuhat sa buang, mao ang pagtapok sa iyang mga karaang sapatos. Gigamit niya ang palis ni Esyot ug gilimpiyohan niini ang mga sapatos nga dugay nang wala gamita tanang  sakop sa pamilya. Ang gibuhat lang ni Esyot mao lang ang pagpaniid sumala sa pagabuhaton niini. Dili mahimong hilabtan kini kay masuko.

“Hi-hi-hi! Limpiya bota na ako,” agik-gik sa buang. “Ikaw Noy Esyot, palimpiyo ka usab?”

“Limpiyo sa iyang kagaral,” bagolbol ni Esyot. “Pastilan kun dili lang ako magpugong, kaayo gayong ihawon para maimpas aron ako makapahulay.”

Ang problema ni Esyot kay ang ilang magulang nga lagi ang nagbuhi kanila, modayon lang kinig laban sa ilang igsuon nga buang. Kay matud pa lagi sa ilang magulang nga kining ilang igsuon nga dunay deperensiya ang utok, mao kuno ang nagdala sa suwerte sa ilang pamilya. Matud pa gayod sa ilang magulang, sukad kuno sa pagkahimugso niini, miasenso ang iyang negosyo. Unya sukad nga mipanaw ang ilang mga ginikanan mga pipila ka mga tuig ang milabay, ang ilang magulang na dayon ang miatiman kanila. Busa, masuko ang ilang magulang kun pasagdan ang ilang igsuon bisan kun deperensiyado ang pangisip niini.

Mao kadto nga gipasagdan lang gayod ni Esyot ang igsuon nga nagpadayon sa iyang pagkalimpiya-bota. Unya miadto si Esyot sa ilang banyo para mosanong sa sugo sa lawas ug gibiyaan ang iyang igsuon samtang nagtingsi kini nga naglimpiyo sa sapatos. Ug sa pagbalik niya  mao na lang ang nakita niya ang iyang igsuon nga nagbukas sa repregirator. Unya dihang nabukas na ang reprigirator, gidala niini ang  mga sapatos sulod sa reprigirator. Pastilan ang reprigirator napuno sa daghang sapatos. Wala na kaha makaagwanta ang ilang magulang, ilang gikasab-an.

“Hoy! Naunsa ba kining bataa?” pulong sa ilang magulang nga ning tungora, gibati nag kalagot. “Naunsa na gayod kanang imong utok? Dili na ba gayod kana matul-id? Asa mo man ibutang kanang mga sapatos?”

“Hi-hi-hi! Ikaw Noy,” tubag sa buang. “Kun ikaw dunay deperensiya ang utok, asa mo man ibutang kining mga sapatos?”

Wala makatingog ang ilang magulang sa gisulti sa buang kay morag siya na hinuon ang nasayop. Igo na lang nakaingon ang ilang magulang, pastilan kun dili ako makaagwanta, ambot unsa kaha ang akong buhaton kanimo. – Kataposan