Gula 6
Gililong namo ni Reuben ang among relasyon ngadto sa akong mga ginikanan. Nakaseguro man god ko nga masuko gayod sila si Papa Amado ug Mama Marlinda kun ilang masayran nga may boyfriend na ako ug amo pa gyong boarder. Mao nga nagkasabot kami si Reuben nga itago ang among relasyon ngadto ni bisan kinsa aron pagseguro nga dili gayod kini mabutyag ngadto sa akong mga ginikanan nga estrikto kaayo.
Sa balay, gidoble namo ang pag-amping sa among mga lihok aron dili hisabtan nga may gitagoan kaming relasyon. Sa akong paniid, wala gayod makadiparal ang akong mga ginikanan nga may relasyon na kami si Reuben kay sa balay modistansiya man gayod kami sa usag-usa aron malikayan ang bisan unsang lama sa pagduda.
Ang among komunikasyon gipaagi lang namo sa cellphone. Kanunay kaming magbaylo-ay og text messages. May coding usab kaming gikasabotan aron dili gayod masabtan sa akong mga ginikanan ang among mga mensahe kun ugaling dili gayod kalikayan nga makabasa sila sa mga text messages sa akong cellphone. Aron pagsegurong dili gayod kami mabuking, wala sab nako irehistro ang ngalan ni Reuben sa phonebook sa akong cellphone uban sa iyang cellphone number. Ngalan sa babaye ang akong gibutang nga mao kunohay tag-iya sa iyang numero. Sa ingon, dili gayod magduda ang akong mga ginikanan bahin namo ni Reuben.
May mga higayon nga magkita mi sa gawas. Kun magkasabot mi pinaagi sa text, sagad adto kami mag-abot sa usa ka department store nga nahimutang sa Colon area. Apan magbantay gyud mi nga walay makakita namo nga posibleng makasumbong sa akong parents nga nagkita kami si Reuben. Gilikayan gyud namo nga mabulgar ang among relasyon ngadto sa akong parents kay seguradong malintian gyud ko kun mahitabo kini.
Usa ka higayon niana, nangadto sila si Papa ug Mama sa lungsod sa Santander. May kabanay kami nga nagpuyo sa maong lungsod nga namatay ug mo-vigil sila si Papa ug Mama sa haya niini. Dili sila makapauli inigkagabii. Gipahibalo dayon nako si Reuben pinaagi sa text nga wala ang akong parents.
Nianang pagkagabii, nakadawat kog text gikan kang Reuben. Paadtoon ko niya sa iyang kuwarto. -- Sumpayan pa