Taudtaod nga naniid si Rey sa palibot sa gawas sa maong balay. Gipalibotan ang maong balay og koral nga semento nga puthaw ang ibabaw sa bahin. Nagtuo si Rey nga si Cong. Temistocles Geligao ang tag-iya sa maong balay tungod kay nahisakop man kini sa pagtarok sa lapad nga luna nga gipanag-iya niini.
Nabati ni Rey ang andar sa generator sa luyong bahin sa balay nga maoy nagsupply og kuryente alang sa mga sugang dagitabnon sa sulod sa gawas niini. Nasuta ni Rey nga dili sayon sudlon ang maong balay tungod kay guwardiyado kini. Pero kinahanglang makasulod siya sa maong balay busa nangita siyag paagi.
Mipaduol pa gayod si Rey sa balay. Sa lagwerta niini, nakita niya ang armadong mga tawo nga nanag-inom. Kauban sa nanag-inom mao ang gulangong lalaki nga naglong sleeved. Mao kini si Cong. Geligao. Nakaila na siya sa kongresista tungod kay nakita na niya ang panagway niini diha sa mga pamantalaan ug gi-flash usab sa tv sa higayon nga gi-interview kini sa taga media kaniadto.
Milihok si Rey. Mipaduol siya sa gate. Iyang gibutangan daan og silencer ang iyang armas. Unya mainampingon siyang mitaktkat sa koral ug miambak ngadto sa sulod. Pagtugpa niya sa yuta, nakugang ang duha ka bantay sa gate nga diha sa duol. Iya dayon kining gipusil ginamit ang iyang armas nga may silencer.
Apan nakapabuto gayod sa armas niini ang usa ka bantay bisan og naigo na kini sa iyang pagpusil. Wala maigo si Rey sa pagpabuto sa maong bantay apan ang buto nga milanog nakapaalerto sa mga tawong armado nga nag-inom sa lagwerta sa balay kauban si Cong. Geligao. Dihadiha girakrakan si Rey sa mga bata-bata sa kongresista. Abtik nga midayib si Rey ug mipasalipod sa miugdo nga landscape.
Nagpadayon pagrapido kang Rey ang mga kaaway. Wala magpaalkanse si Agent 11-M. Miligid siya paingon sa gawas sa iyang gipasalipdan ug gipamusil ang kutob sa mapabor kaniya. Tulo ka bata-bata sa kongresista ang mihagba sa yuta. Nakita ni Rey si Cong. Geligao nga midali pagsulod sa balay.
Pulos tag-as ang mga hinagiban sa mga kaaway. Seguradong lupigon si Rey kun makig-atubangay siya kanila. — Sumpayan pa