(Gula 70)
Naputol ang panagsulti nila ni Rey ug Leon Gernale dihang nagpaingon sa ilang nahimutangan si Chief Inspector Max Jacob.
“Wa gyoy nahibiling buhi, Mr. Corpuz,” nagkanayon si Chief Inspector Jacob. “May na-recover ming kinarton nga pekeng mga tambal sulod sa bodega.”
“May ebidensiya kong nahipos nga maoy magmatuod nga si Luis Monsanto mao ang nagtakoban og George Mirano nga maoy consignee niadtong pekeng mga tambal nga inyong na-intercept sa tugpahanan sa Mactan. Klaro kaayong gigamit lang niya ang ngalan sa Visayas Pacific Laboratories sa iyang pagpakigkunsabo sa usa ka politiko nga maoy responsable sa pagpalusot sa pekeng mga tambal sa Sugbu.”
“Kinsa nga politiko, Mr. Corpuz?”
“Si Cong. Temistocles Geligao. Siya ang local contact sa sindikato sa Australia nga nagpalusot og pekeng mga tambal dinhi sa Pilipinas.”
“Giunsa mo man pagkasayod niana?”
“Si Luis Monsanto mismo ang mitug-an niana kaganina sa wala pa kamo mangabot. Uyoan diay niya si Cong. Geligao maong dili siya makabalibad sa bisan unsang ipabuhat niini. Na-record nako sa gamay kong recording gadget ang tanang gisaysay ni Mr. Monsanto kaganina ug magamit ta kining ebidensiya batok kang Cong. Geligao. Kini usab ang magmatuod nga wala gayod malambigit ang VPL sa bisan unsang anomalosong palusot sa pekeng mga tambal kondili gigamit lang ang ngalan niini sa mga tawong hakog.”
“Kun mao kana, Mr. Corpuz, kinahanglang mataral sa hukmanan si Cong. Geligao.”
“Kinahanglang malutsan dayon siya’g warrant of arrest sa dili pa siya makasibat, Chief, aron patubagon siya sa salaod nga iyang nahimo.”
Pagkaugma, maoy labing dakong balita sa radyo ang nahitabong pinusilay didto sa usa ka karaang bodega nga gipanag-iya ni Cong. Temistocles Geligao. Naukay ang katawhan sa maong hitabo. Init kaayo ang maong isyu nga gihisgotan sa media.
Naningkamot ang mga operatiba sa PDEA ug CIDG nga malutsan dayon og warrant of arrest si Cong. Geligao. – Sumpayan pa