(Gula 69)
Si Leon Gernale diay ang mitaho ngadto sa mga tinugyanan sa balaod nga gidagit si Althea Moran sa mga sakop ni Luis Monsanto. Daan na diay’ng nasayod si Mr. Gernale nga si Luis Monsanto mao ang utok sa pagkalambigit sa VPL sa anomalosong pagpalusot sa pekeng mga tambal. Gitago lang niya ang iyang nasayran tungod sa kahadlok. Nasayod man god siya nga lig-on kaayog koneksiyon si Luis Monsanto ug mameligro ang iyang kinabuhi kun magpakabayani gayod siya.
“Mao diay nga ingon sa wala ikaw’y interes sa pagkooperar sa gihimo kong imbestigasyon?” Sukit ni Rey kang Leon Gernale.
“Mao kana, Mr. Corpuz,” tubag ni Mr. Gernale. “Nabalaka man god ko nga kun mabulgar ug mautingkay ang tinuod tungod sa imong pag-imbestigar, daghan ang maangin tungod kay dili basta-basta ang koneksiyon ni Mr. Monsanto.’
“Lahi ra ba ang akong impresyon sa gipakita mong ka-walay interes sa gihimo kong imbestigasyon. Natahap ko nga ikaw ang nagtakoban nga si George Mirano.”
“Dili ko ikaw mabasol kun mao kanay mosantop sa imong hunahuna, Mr. Corpuz. Bisan ako pa sa imong dapit, mao sab tingali kana ang mahitabo.”
“Pero giunsa nimo pagkasayod nga gidagit si Althea.”
“Naatol kadto nga miadto ako sa iyang gipuy-an kagahapon kay may mahinungdanon unta kong pakigsultihan niya.”
Si Mr. Gernale miasoy nga dihang nagsingabot na siya sa balay ni Althea, nalantawan niya ang duha ka sakyanan nga nagdali pagbiya. Pag-abot niya tungod sa gate sa balay, nanaog dayon siya. Pero maoy iyang natukmaan ang duha ka security guard nga pulos naglunang sa ilang dugo. Buhi pa ang usa ka sekyu ug maoy mitug-an kaniya nga gidagit si Althea sa armadong mga tawo.
“Gisundan dayon nako ang duha ka sakyanan sa igong gilay-on aron dili ko nila mamatikdan,” ni Leon Gernale pa. “Dihang natino nakong dinhi nila dad-a si Althea, nanawag dayon ko kang Chief Inspector Max Jacob.”
“Husto ang imong gihimo, Mr. Gernale,” ni Rey pa. “Maayo kay nakaresponde usab dayon ang mga awtoridad nga wa pay nahitabong daotan kang Althea.” — Sumpayan pa