Gabii na, Rey Corpuz!

(Gula 68)

Nagpadayon ang sinukliay sa mga bala. Nagsinibog ang mga sakop ni Luis Monsanto nga nakigsangka sa mga tinugyanan sa balaod. Nag-anam silag kadiyotay kay daghan na kanila ang nangamatay. May nasamdan na usab sa habig sa mga awtoridad.

“Paspasan ta kini, Mr. Corpuz,” nagkanayon si Chief Inspector Max Jacob sa CIDG. “Dili na makagawas nga buhi kining mga tawhana kun dili sila moampo. Tuay daghang mga sakop nako nga nag-atang sa gawas sa bodega.”

“Maayo hinuon kun mao kana, Chief,” ni Rey pa, “aron dili gyud sila makaikyas.”

Dihadiha nagbulag sila si Rey ug Chief Inspector Jacob. Nag-iyahay silag pangita sa nahibiling mga kaaway nga diha pa sa sulod sa bodega. Walay kukahadlok si Rey nga nakigsangka sa mga kaaway. Duha ka armas ang iyang gigunitan. Wala ug tuo ang iyang tayada sa mga kaaway. Walay kukaluoy niyang gihunosan sa kinabuhi ang mga sakop ni Luis Monsanto nga wala gayod mopakitag timailhan nga mosurender.

Hangtod nga mao nay gikasangka ni Rey si Luis Monsanto. Uzi ang armas niini. Miligidligid si Rey sa sementong salog sa bodega dihang gipusil siya ni Luis Monsanto. Unya dihang siya na usab ang nakapabor, mibalos pagpusil si Rey. Usa ra ka bala ang mikutlo sa kinabuhi ni Luis Monsanto kay sa kinatung-an man sa duha niini ka mata naigo ang Judas nga senior vice president sa VPL sa pagpusil ni Rey.

Miusa pagtang-on ang buto-buto. Naniid si Rey sa palibot. Wala nay timik. Morag wala nay timailhan nga may kaaway  pa nga nagpabiling nagbarog.

“Men,” nabati ni Rey ang tingog ni Chief Inspector Jacob. “Search the area!”

Milihok dayon ang mga sakop ni Jacob aron pagtuman sa gimando niini. Si Rey midali paggawas sa bodega dihang nahinumdoman niya si Althea.

“Rey...!”

Gitawag siya ni Althea dihang nakita siya niini nga migawas gikan sa bodega. Miduol dayon siya sa nahimutangan ni Althea nga may kaubang upat ka sakop sa CIDG. Nakita usab ni Rey si Leon Gernale. Nahibulong siya pagkakita niini. Apan nasayran niya nga si Leon Gernale diay ang nakaanghel kanila ni Althea. — Sumpayan pa