Gabii na, Rey Corpuz!
Gula 67
Namatikdan ni Rey nga daw natarantar si Luis Monsanto pagkasayod nga nangabot sa dapit nga nahimutangan sa karaang bodega ang mga awtoridad. Morag na-rattle kini pag-ayo. Nahadinga-dinga kini. Nag-panic si Luis Monsanto og maayo.
“Atubanga ninyosila,” matud ni Luis. “Ayaw ninyo pasagding makasulod sila sa bodega. Lihok na kamo!”
Milihok dayon ang tanang mga sakop ni Luis Monsanto nga pulos armado. Ilang gisugat ang mga sakop sa CIDG ug PDEA nga buot mosulod sa bodega.
Tungod ba kaha sa sobrang pagkatarantar, wala na panumbalinga ni Luis Monsanto sila si Althea ug Rey nga gigapos sa haligi. Mibiya kini sa ilang nahimutangan, kaha aron mangita og katagaoan. Samtang sa gawas sa bodega, nagpadayon ang pinusilay.
“Rey,” sangpit ni Althea. “U-unsaya tong buhaton?”
“Maghulat kitag hustong panahon,” ni Rey pa. “Wala kitay mahimo niining higayona tungod kay pareho kitang gigaid sa haligi.”
Nagpadayon ang pinusilay. Matag karon ug unya ang butobuto sapawan sa agulo sa kasakit ug tig-ik sa kamatayon. Daghan na sa mga sakop ni Luis Monsanto ang nakabsan sa kinabuhi kay nakalitan sila sa pag-atake sa mga tinugyanan sa balaod.
Misibog ang nahibiling mga sakop ni Luis Monsanto sa dihang dili na gayod mabangbang ang pag-atake sa mga tinugyanan sa balaod. Nakasulod ang mga sakop sa CIDG ug PDEA sa bodega. Nabadbaran sa gapos sila si Althea ug Rey.
Giseguro pagtugyan ni Rey si Althea ngadto sa mga awtoridad aron mahimutang sa safety ang kinabuhi niini. Duha ka sakop sa CIDG ang midala kang Althea paingon sa gawas sa bodega. Si Rey mitabang na sa mga sakop sa CIDG ug PDEA sa pagpakigsangka sa nahibiling mga sakop ni Luis Monsanto.
Bang! Bang! Bang! Bang!
Morag migara ang pulso ni Rey Corpuz. Matag kablit niya sa gatilyo sa iyang armas,
- Latest
- Trending
