Naisog si Onyok

Lawom na ang kagabhion apan wala pa makahitulog si  Onyok. Nagpunay siya’g limbaglimbag ibabaw sa katre. Nagngulngol pag-ayo ang iyang ngipon.

“Giingnan ko na bitaw ka nga ipaibot na sa dentist,” nagsipit og sudya ang sinultihan ni Koring,” apan wala ka gyud mokihol.”

“Mahal man gud kaayo ang bayad kun magpaibot og ngipon, Ring,” nangatarongan siya.

“Ingna lang hinuon  nga kanang imong katalawan ang nakaingon nga hangtod karon nagpabilin kang nag-antos sa kasakit sa imong ngipon,” matud ni Koring.

“Wala motingog si Onyok. Tinuod ang gisulti ni Koring nga mahadlok siyang magpaibot sa iyang ngipon. Talawan siya’g sakit sa pag-ibot sa ngipon. Ingon sa may phobia siya niini. Sa nag-edad pa gud siya og walo, naibtan siya’g ngipon sa dentist. Bisan may anesthesia apan gisakitan gihapon siya. Hapit siya makuyapi niadtong higayona.

Sukad niadto nakapanumpa siya nga dili na gayod siya magpaibot og ngipon sa dentist bisan pag madunot ang tanan niyang ngipon. Mitagam  siya.  Alang kaniya maayo pay tulion siya’g kapito kay sa hingoan og ngipon nga puwerteng sakita.

Mao nga karon nag-antos siya sa kasakit sa iyang ngipon. Niadto pang miaging semana nga nagpunay og apura si Koring kaniya nga makigkita kang Dr. Quir Valle, ang dentist nga nagpuyo sa kinapusoran sa ilang lungsod. Apan wala siya mokihol.

“Kun magpadaog ka sa imong kahadlok, magpadayon ka gyud pag-antos sa kasakit nianang dunot mong ngipon,” nagkanayon si Koring nga misikdo sa iyang kahiamgo.

“Bahala na,” matud ni Onyok.

Mitakilid si Koring patalikod kaniya. Nasabot niya ang gusto na kining matulog busa wala na lang kini niya tugawa.

Wala madugay, nabati na niya ang hagok ni Koring nga walay kalainan sa hadyong sa usa ka buyog. Nahikatulog na ang iyang asawa. Apan siya wala gayod duawa sa katulogon. Maoy mipasulabi ang tumang kasakit sa iyang ngipon.

Nianang mga ala una sa kaadlawon nabatyagan ni Onyok nga misamot pagsakit ang iyang ngipon. Mingulngol kini pag-ayo. Naglimbaglimbag siya sa kasakit. Ingon sa misaka na sa iyang alimpulo ang kasakit. Dili na gayod siya makaantos. Dinhing bahina nga nakahukom na gayod si Onyok nga ipaibot sa dentist ang iyang ngipon.

Pagkabuntag, human sa pamahaw, migikan gilayon si Onyok paingon sa kinapusoran sa lungsod aron makigkita sa dentist nga maoy moibot sa iyang ngipon. Maabiabihon kining mipadayon kaniya sa klinika niini. Gidaygan dayon niya kini sa iyang tuyo. Gihiling niini sa daklit ang iyang ngipon.

“Talawan ra ba ko’g sakit sa paghingo sa ngipon, Dok,” gipasidan-an ni Onyok ang dentist.

“Dili kana problema,” sa dentist pa. “Aduna kitay anesthesia.”

“Bisan na, Dok,” ni Onyok pa. “Sakitan gihapon ko bisa’g may anesthesia. Talawan man gud ko’g sakit sa pag-ibot og ngipon.”

“Mao ba?” sa dentist nga mitutok kaniya. Dayon may gikuha kini gikan sa usa ka kabinet sulod sa klinika. Usa ka botelya sa imported nga alak. Gitunol kini sa dentist  kaniya ug miingon. “Imna kining bino aron maisog ka ug dili na mahadlok sa sakit sa pag-ibot sa ngipon.

“Maayo kaha, Dok, nga moinom ko?” mitutok siya sa dentist.

“Ang tinuod dili gyud unta angay nga ako kang paimnon niini,” sa dentist pa. “Apan talawan kaman kaha sa sakit sa pag-ibot sa ngipon maong paimnon tikaw og bino aron maisog ka na.”

Nakombinser si Onyok sa pasabot sa dentista. Giinom niya ang gitanyag nga alak. Bisan pait apan naningkamot siyang makainom og daghan. Ug tungod kay wala man siya maanad pag-inom og ilomnong makahubog, kadali ra siyang  naigo sa esperitu sa alak. Nahubog siya.

“Hingoon na nato ang imong ngipon,” nagkanayon ang dentist.

“Hingoag suway, Dok,” ni Onyok pa, “kay makatilaw ka gyud sa akong kinumo. Isog na ko ron. Di ko mahadlok bisa’g doktor ka pa.”

Igo na lang nangalot sa iyang ulo ang dentista. (Kataposan)