Gabii na, Rey Corpuz!

(Gula 66)

Samtang nakigsulti si Luis Monsanto kang Althea, naghinamhinam si Rey Corpuz nga masayod sa uban pang kamatuoran ug tinagoan nga ibutyag niini ngadto sa dalaga. Gusto niyang ma-record sa moderno niyang relo ang tanan nilang panagsultihan.

“Akong uyoan si Cong. Temistocles Geligao,” nagkanayon si Luis Monsanto. “Siyay local contact sa usa ka dakong sindikato didto sa Australia nga nagpalusot og pekeng mga tambal dinhi sa Sugbu. Siya usay tag-iya niining bodega.”

“Nganong mitugot ka man nga gamiton ang ngalan sa VPL sa pagpalusot sa pekeng mga tambal?” Sukmat ni Althea. “Gibulingan mo ang reputasyon sa kompaniya.”

“Sa gikaingon ko na, Miss Moran,” ni Luis pa, “dili nako kabalibaran ang akong uyoan nga congressman. Akoy iyang gihangyo tungod kay iyang nakita nga anaa ako sa maayong posisyon pagtabang aron makalusot ang iyang mga transaksiyon kay konektado man ako sa VPL. Nagplano ang akong uyoan nga magpapili pagka senador sa umaabot nga eleksiyon mao nga nangandam na siya karon pa lang. Ang minilyon nga iyang kitaon sa mapalusot nga pekeng mga tambal maoy iyang gamiton sa iyang kampanya. Kun wa pa lang mabulilyaso ang among transaksiyon sa mga awtoridad nga naka-intercept sa pekeng mga tambal, di unta magkaproblema ang VPL. Ug labaw sa tanan, kun wa pa nimo kuhaa ang serbisyo ni Rey Corpuz aron paghimog linain nga imbestigasyon, di unta mosangko sa ingon niini ang tanan, Miss Moran.”

“Ayaw kog basola, Luis Monsanto,” ni Althea pa. “Kun aduna may mabasol niining hitaboa way lain kun dili ikaw tungod kay nagpagamit ka sa daotan.”

Sa kalit lang may milanog nga mga butobuto didto sa gawas sa bodega. Nakugang pag-ayo si Luis Monsanto. Dihadiha, gimandoan niya ang iyang mga sakop pagsusi kun unsay nahitabo sa gawas. Milihok dayon ang iyang mga tawo.

Boss,” matud sa usa ka sakop ni Luis Monsanto nga naghangos nga mibalik sa nahimutangan nila misulod sa bodega. “May nangabot nga  mga awtoridad. Mga operatiba sa CIDG ug PDEA ang gikasangka sa atong mga kauban.”

“Punyita!” Misinggaak si Luis Monsanto sa kapungot.

Apan si Rey nahimuot ug nahinangop sa hilom. – Sumpayan pa