Gabii na, Rey Corpuz!

(Gula 65)

Misurok pag-ayo ang dugo ni Rey Corpuz tungod sa gibati niyang kalagot. Karon pa niya mapamatud-i sa hingpit nga salbahis diay kaayo si Luis Monsanto.  Tiaw ba nga lakip si Althea gipadagit man diay usab niini? Unsa man kahay tuyo ug plano ni Luis Monsanto sa pagpadagit kang Althea? Naluoy si Rey nga nagtan-aw kang Althea nga gigapos usab sa haligi sama kaniya. Apan unsay iyang mahimo?

Wala kawad-ig paglaom si  Agent 11-M. Samtang dili pa siya kahunosan sa kinabuhi sa mga kaaway, aduna pay kahigayonan nga maluwas siya gikan sa tino nga kamatayon. Kinahanglang maluwas niya ang iyang kaugalingon ug si Althea.

“U-unsay buot ipasabot niini, Mr. Luis Monsanto?” Nakapangutana si Althea pag-kakita niini kang Luis nga miduol sa nahimutangan niini. “Unsay inyong gibuhat kang Rey? I-ikaw ba usab ang nagpadagit kanako?”

“Wa ka masayop, Miss Althea Moran,” laktod nga tubag ni Luis Monsanto.

“Siya ang traydor sa imong kompaniya, Althea,” misagbat si Rey. “Siya mao ang nagtakoban og George Mirano. Siya ang Judas sa VPL.”

“Hayop ka, Luis Monsanto!” ni Althea pa. “Hayop  kang dako!”

“Ingon lang gyud niini ang kinabuhi, Miss Moran. Adunay mga baligho  nga dili lang nato damhon nga mahitabo sa atong kinabuhi. Sama sa nahitabo ninyo ni Rey Corpuz. Wa kamo magdahom nga ako mao si George Mirano. Ug sa dihang nabutyag na ang matuod, ulahi na ang tanan ug dili na kamo makapanagang.”

Niining higayona, naningkamot si Rey nga ma-activate ang recording link sa modernong relo de pulso nga iyang gisul-ob bisan og gigapos siya. Tuod man, milampos si Rey. Na-activate gayod niya ang recording link sa iyang relo bisan naglisod siya  sa pagpahigayon niini tungod sa kahugot sa pagkagapos sa iyang mga kamot.

“Nganong gibuhat mo kini, Luis Monsanto?” Nangutana si Althea.

“Tungod sa personal nga interes, Miss Moran,” tubag ni Luis, “ug sa interes sa tawo nga dili nako katalikdan, si Cong. Temistocles Geligao.”

“U-unsa?” Nakugang si Althea. -- Sumpayan pa