Gabii na, Rey Corpuz!

Gula 63

Gi-activate dayon ni Rey Corpuz ang remote control sa iyang sakyanan diha sa iyang cellphone. Gipabalik niya ang sakyanan sa iyang nahimutangan. Paghunong niini sa iyang tungod, misakay dayon siya. Gipadagan dayon niya ang awto. Nagpadulong siya sa gipuy-an ni Luis Monsanto. Paspas ang iyang pagpadagan sa awto.

Wala gayod magdahom si Agent 11-M nga si Luis Monsanto mao diay ang nagtakoban og George Mirano nga maoy consignee sa pekeng mga tambal nga na-intercept sa mga awtoridad sa Mactan airport luwan sa usa ka private plane. Wala siya masayop sa iyang pagduda nga si Leon Gernale maoy traydor sa VPL. Si Luis Monsanto diay ang tinuod nga Judas nga nakigkunsabo sa usa ka politiko. Ug posibleng drama lang kadtong nahitabong pagpangrakrak sa balay niini aron paglansis kanila.

Pag-abot ni Rey sa gipuy-an ni Luis Monsanto, nanaog dayon siya sa iyang awto. Dili unta siya pasudlon sa guwardiya apan namugos siya. Dihang nagmagahi gyud ang guwardiya, iya kining gikarate ug nakuyapan kini. Nakasulod gayod si Rey sa panimalay ni Luis Monsanto. Ug gikaatubang gayod niya ang tawo nga maoy iyang tuyo.

“Gabii na, Rey Corpuz,” nagkanayon si Luis. “Unsay ikaalagad ko kanimo nga mianhi ka man sa akong gipuy-an niining orasa sa kagabhion?”

“Karon ang gabii sa pagbukas sa kahayag, Luis Monsanto,” tubag ni Rey. “Nia ko aron pagtukas sa maskara  ni George Mirano.”

“U-unsay buot mong ipasabot, Mr. Corpuz?”

“Ayaw na lang pagminaot, Mr. Monsanto. Wa nay kapuslanan ang pagtago sa kangitngit. Nabisto na ang matuod mong pagka tawo. Misuka sa tinuod ang usa sa imong mga sinugo sa pagpatay unta nako ug nasayran ko na ang kamatuoran. Ikaw diay ang nagtakoban nga si George Mirano. Nia ko aron pagdakop kanimo.”

Apan nakapangandam na diay si Luis Monsanto. Dihang posasan na unta kini ni Rey, kalit nanungha ang armadong mga sakop niini. Ang usa midaitol sa armas niini sa iyang tangkugo. Wala makalihok si Rey. -- Sumpayan pa