Gabii na, Rey Corpuz!

(Gula 62)

Nagsunodsunod og kahagba sa sementadong parking lot ang tulo ka kaaway nga gipamusil ni Rey Corpuz. Gitulpok niya ang key 0 sa iyang cellphone aron mohunong na pagdagan ang iyang awto nga didto na sa layo. Naniid si Rey sa palibot. Human masuta nga wala nay peligro, migawas siya sa iyang gitagoan ug mipaduol sa nahagbaan sa tulo ka kaaway nga iyang napusilan aron magsusi.

Naglihok pa ang usa sa mga kaaway nga napusilan ni Rey. Giduol niya kini. Mitikubo siya ug giguwarnihan ang liab sa jacket nga gisul-ob niini.

“Kinsay nagsugo ninyo sa pagpatay nako?” Sukit ni Rey dungan ang pag-activate sa recording link sa iyang modernong relo de pulso.

Wala motingog ang kaaway nga nagkadugo. Mingislo ang nawong niini sa kasakit.

“Tug-ani ko!” Gihugtan ni Rey ang pagguwarni sa kuwelyo sa jacket sa samaron nga lalaki aron mapursige kini pagtug-an sa gusto niyang masayran.

“S-si  S-sir L-luis M-Monsanto...” nagkaputolputol ang sinultihan sa tawo.

“U-unsa?” Nakugang si Rey.

“S-siya a-ang...”

“Ayaw iangin si Mr. Monsanto sa inyong kadaotan!”

“M-mao k-kana a-ang m-matuod, S-sir...”

Sa bugto-bugto nga tingog, ang tawong samaron mitug-an kang Rey nga si Luis Monsanto, ang senior vice president sa VPL, mao diay ang nagtakoban nga si George Mirano. Daw maglisod pagtuo si Rey sa giasoy sa himalatyon nga lalaki. Apan kombinsido siya nga nagtug-an kini sa tinuod tungod kay ang tawo nga anaa na ang kinabuhi sa ngilit sa kamatayon dili na makamaong mamakak.

Mitug-an usab ang naghingutas nga lalaki nga si Luis Monsanto nakigkunsabo ni Cong. Temistocles Geligao nga maoy local contact sa sindikato sa pagpayuhot og pekeng mga tambal gikan sa Australia. May ipangutana pa unta si Rey apan miting-ab na ang lalaki. Nabugtoan na kini sa gininhawa. Apan na-record gayod ni Rey ang tanan nga gitug-an niini kaniya. Nakapaminti si Rey sa kamatuoran nga iyang nasayran. -- Sumpayan pa