Duha ka gugma nag-abot

Usa ka maanyag nga CPA ug tag-iya sa halapad nga Hacienda Violeta si Violeta delos Reyes. Lima na ka tuig nga na-confine siya sa wheel-chair gumikan sa aksidente sa ilang kotse nga maoy hinungdan sa kamatayon sa iyang mga ginikanan.

Sa hilom nahigugma siya kang Rodrigo nga iyang sinaligan sa asyenda ug anak kini sa usa nila ka saop. Ambongan si Rodrigo ug bisan elementarya lang ang natapos niini, apan kugihan ug bootan kini. Si Violeta walay namatikdan kang Rodrigo nga may gusto kini kaniya kay kun iyang tan-awon, moduko man dayon kini sama sa maulaw.

“Rodrigo,” gitawag niya ang ulitawo usa ka sayong gabii niana. “Saka una diri kay duna kitay panagsultihan.”

Misaka ang ulitawo sa mansion ug human siya palingkora sa dalaga nangutana kini. “Duna kay isugo señorita?”

Imbis motubag, nangutana kini, “nanihapon ka na ba?”

“Gipakaon na ‘ko ni Iya Bestra didto sa kusina.”

“Pila nay imong edad Rodrigo?”

“Treinta na señorita.”

“Maguwang ka lang diay nako og tulo ka tuig. Nganong wa ka pa man magminyo Rodrigo nga naa may daghang babaye nga akong nakita nga may gusto nimo?”

“Wa man ‘koy nagustohan kanila señorita. Duna unta ‘koy napili ug gimahal apan nakita ko nga dili ako takos ug angay kaniya.”

“Pare-pareho ang tanan kun gugma ang pagahisgutan Rodrigo. Nakaila ba ako nianang bayhana?”

“Nakaila ka kaniya señorita, apan gumikan sa gintang sa among kahimtang dili ako makaako pagpadayag sa akong gugma apan malipay na kaayo ako nga makita siya ug mopahiyom nako.”

“Ka suwerte nianang bayhana Rodrigo - sultihi ako - si kinsa man na siya?”

“Ikaw mao ang babaye señorita,” dayong duko ni Rodrigo kay dili siya makaharong og tan-aw sa iyang agalon.

Midaligdig ang luha ni Violeta sa iyang nadungog. Luha sa kalipay kay wala siya magdahom nga ang lalaki nga iyang gimahal sukad pa sa iyang pagkabata nagmahal diay usab niya.

“Karon Rodrigo,” matud sa dalaga nga namahid sa iyang luha, “kun sultihan ko ikaw nga pareho tang duha nga nagmahal..”

Miluhod si Rodrigo sa atubangan sa wheel-chair ni Violeta ug gikuptan ang duha ka kamot niini.

“Lipayon ko ikaw hangtod sa katapusang gutlo sa akong kinabuhi señorita.”

“Ayaw na ‘kog tawga og señorita ug magpakasal ta sa daling panahon.”

“Apan wala pa ako makaandam mahal kong Violeta.”

“Unsay imong andamon- baboy-baka-manok? Nia sa asyenda ang tanan.”

Sa kalipay nasapnay ni Rodrigo si Violeta ug gihagkan kini, “Matuman ang gusto mo mahal kong Violeta.” – Katapusan