Gabii Na, Rey Corpuz!

Gitak-opan dayon ni Rey ang pultahan dihang nakasulod na si Althea. Gisundan niya si Althea nga mipaingon sa nahimutangan sa mahunolhunol nga kama.

“Nakatulog ka gyud tingalig maayo, no,” ni Althea pa, “maong dugay kang nakaabli sa pultahan.”

“Husto ka,” ni Rey pa usab. “Wa man god koy tarong kinatulgan kagabii.”

“Kaganira ra kong buntag nga nagpunay’g kontak sa imong cellphone pero cannot be reached kini. Unsa bay nahitabo?”

“Nag-lowbat ko. Wa pa nako ma-charge ang akong cellphone kay may mahinungdanon kong giatiman kaganinang buntag. Nataligam-an nako pag-charge ang cellphone.”

Nasayod na diay si Althea sa nahitabo kaniya. Nakabalita kini sa radyo bahin sa engkuwentrong nahitabo didto sa North Reclamation area diin si Rey Corpuz maoy bida. Misamot ang belib ni Althea kang Rey.

“Kun na-contact ko pa ikaw kaganinang buntag,” ni Althea pa, “kaganina ra unta kong moanhi dinhi.”

“Maayo ra sab nga wa ka mopahinayak,” ni Rey pa. “Misayo kog biya sa hotel kaganina. Gihatod nako sa shop ang akong sakyanan kay dako kaayo ang kadaot nga nahiagoman niini atol sa akong pagpakig-engkuwentro sa mga kaaway.”

“Unsa na man sab ning hitaboa?”

“Nagtuo ko nga ang mga tawo nga akong gikaengkuwentro didto sa North Reclamation area mao ra usab ang mirapido sa balay ni Luis Mosanto.”

“Nakabalita bitaw ko nga girapido kuno ang balay nila ni Luis Monsanto kagabii. Nanawag man siya nako. Gisibya pod kini sa radyo kaganina.”

“Gipahibalo sab ko ni Luis Monsanto sa nahitabo sa iyang balay kagabii maong miadto ko. Apan sa akong pagpauli, gisundan ko sa mga tawo nga nagsakay og van. Bisan walay plate number ang van nga ilang gisakyan apan may alas kong gigunitan.”

“U-unsay buot mong ipasabot?”

“Nadakpan nakong buhi ang usa sa mga kaaway. Siya’y akong patug-anon sa kamatuoran.” -- Sumpayan pa