Gituyo ni Rey Corpuz nga pasakitan og maayo ang kaaway tungod kay naglagot siya nga nakahimo kinig dakong kadaot sa iyang sakyanan. Apan wala siya’y plano sa pagpatay sa maong kaaway. Iya kining buhion aron patug-anon sa kamatuoran. Daghan siya’g gustong pakisayran gikan niini. Giposasan ni Rey ang samaron nga tawo.
Gikontak niya si Chief Inspector Max Jacob sa CIDG ug gipahibalo sa nahitabo. Igo lang siyang nahuman pagpakigsulti kang Jacob, may nangabot nga mga sakop sa Mobile Patrol Group. Nagpaila dayon si Rey ngadto kanila. Ang pipila ka polis nga miresponde daan nang nakaila kaniya. Gisaysay niya ngadto kanila ang nahitabo.
Wala madugay nahiabot usab si Chief Inspector Max Jacob uban sa pipila ka mga sakop niini. Miduol kini kang Rey samtang nakigsulti pa siya sa taga MPG. Giugkat sa kapolisan ang mga patay’ng lawas sa mga kaaway nga napatay ni Rey. Samtang gihatag ni Rey ngadto sa MPG ang tanan nga buot nilang masayran.
Pagkahuman, gidala ni Rey sa tambalanan ang samaron nga kaaway aron kini patambalan. Gikuyogan siya sa taga CIDG. Giatiman dayon ang pasyente sa mga mananambal. Gipabantayan ni Chief Inspector Max Jacob og duha sa iyang mga sakop ang ward diin nahimutang ang tawo nga napusilan ni Rey.
“Maayo kay nabuhi ang usa, Mr. Corpuz,” nagkanayon si Chief Inspector Jacob sa dihang nanggawas na sila sa tambalanan. “Basin magamit nato siya.”
“Gituyo ko nga wala siya patya,” ni Rey pa, “kay ako siyang patug-anon kun kinsay nagsugo nila sa pagpatay nako. Nagtuo ko nga may kalabotan gayod kini sa linain nga imbestigasyon nga akong gihimo bahin sa pagkalambigit sa VPL sa palusot sa pekeng mga tambal dinhi sa Sugbu.”
Sa paghiabot na nila sa giparkingan sa ilang tagsatagsa ka sakyanan, nagpanamilitay na sila si Rey ug Chief Inspector Jacob.
“Pag-amping, Mr. Corpuz,” ni Jacob pa nga mipaandar na sa makina sa sakyanan niini. “Magkontakay lang unya kita kun dunay mga development.”
“Salamat sa imong pag-abag,” ni Rey pa nga nakasakay na usab sa iyang awto. -- Sumpayan pa