Gabii Na, Rey Corpuz!

Taudtaod nga naghinuktok si Rey Corpuz. Gitimbangtimbang niyag maayo sa iyang hunahuna kun angay ba niyang tug-anan si Luis Monsanto sa lakaw sa gihimo niyang linain nga imbestigasyon bahin sa kasong gikalambigitan sa VPL. Unya misantop sa iyang hunahuna nga may katungod usab si Luis Monsanto nga masayod kun unsay development sa iyang imbestigasyon ngalan nga kini ang senior vice president sa VPL.

"Mahimo bang hatagan ko nimog update sa gihimo mong imbestigasyon, Mr. Corpuz?" Nangutana si Luis Monsanto taliwala sa kahilom ni Rey.

"May development na, Sir," tubag ni Rey. "Ang among ahensiya nakadawat og confidential nga information nga na-wiretap sa Australian Federal Police ang telephone conversation sa mga sakop sa sindikato didto sa Australia ug sa ilang local contact dinhi sa Cebu. Adunay usa ka politiko nga nalambigit sa palusot og pekeng mga tambal dinhi sa Sugbu, Sir."

"U-unsa?" Nakugang si Luis Monsanto.

"Mao kana, Sir. Apan dili ko pa ikatug-an kanimo ang ngalan sa maong politiko kay dili pa kongkreto ang akong mga ebidensiya. Dili ko gustong ma-preempt ang gihimo kong imbestigasyon ug hinaot nga imo kong masabtan."

"Nakasabot ko, Mr. Corpuz."

Human sa panagsulti nila ni Luis Monsanto, mibiya na si Rey sa gipuy-an niini. Mopauli na siya ngadto sa hotel nga iyang giistaran. Sa taudtaod niyang pagmaneho sa iyang awto, nakamatikod siya nga may sakyanan nga nagsunod kaniya. Nagduda si Rey sa maong sakyanan maong iya kining gibantayan.

Miliko si Rey sa usa ka eskina. Gipakusgan niyag diyotay ang pagpadagan sa iyang gisakyan. Unya misil-ip siya sa side mirror. Iyang nasuta nga miliko sab ang maong sakyanan ug padayong nagsunod kaniya.

Nangandam si Rey sa iyang kaugalingon. Nasuta niyang siya maoy tuyo sa mga nagsakay sa van nga nagsunod kaniya. Gipakusgan pa gayod niya ang iyang pagpadagan. Miliko siya sa laing eskina apan nakasunod gihapon ang van kaniya. — Sumpayan pa