Gabii na, Rey Corpuz!

Nianang pagkaugma, nagpatawag si Althea Moran og meeting sa tanang sakop sa management and staff sa Visayas Pacific Laboratories diin siya ang nagbarog nga chairman. Mitambong sa maong tigom si Rey Corpuz. Gusto ni Althea nga ipaila si Rey ngadto sa mga kawani sa VPL. Ang meeting gipahigayon sa usa ka hamugaway nga function room sa Casino Royale de Español. Exclusive ang maong lugar.

Gitagsatagsa ni Althea pagpaila ngadto kang Rey ang mga sakop sa management and staff sa VPL. Daan nang nakaila si Rey ni Atty. Quilaton, ang legal counsel sa kompaniya. Gipaila usab ni Althea kaniya sila si Buddy Laudico, ang   presidente; Luis Monsanto, senior vice president; Leon Gernale, general manager; Ernesto Cortesa, marketing director; Fred Cruzado, operations manager ug Quirino Garcilla; commercial sales head. Unya si Rey na usab ang gipaila ni Althea ngadto kanila.

Pagkahuman, gipadayag ni Althea ang iyang tuyo sa pagpatawag sa maong meeting nga tinambongan ni Rey Corpuz. Iyang gisaysay ngadto kanila ang iyang tuyo sa pagkuha sa serbisyo ni Rey aron mag-imbestigar bahin sa pagkahilambigit sa VPL sa pagpayuhot sa pekeng mga tambal gikan sa Australia.

"Nganong mi-hire ka pa man gyud og detective agent, Miss Moran?" Sukit ni Leon Gernale. "Nganong dili na man lang nato paaboton ang hukom sa korte? Total, gisugdan na man pagbista ang kaso batok sa VPL."

"Dili na ko makapaabot sa hukom sa korte, Mr. Gernale," ni Althea pa. "Gusto kong masayran kun kinsay responsable sa paglambigit sa VPL sa pagpayuhot og pekeng mga tambal gikan sa laing nasud."

"U-unsay buot mong ipasabot, Miss Moran?" Mikunot ang agtang ni Leon Gernale.

"Nagduda kami si Atty. Quilaton nga may sindikato nga migamit sa ngalan sa kompaniya alang sa illegal nga kalihokan, Mr. Gernale," tubag ni Althea.

"U-unsa?" Misamot pagkunot ang agtang ni Leon Gernale.

"Mao kana, Mr. Gernale," sagbat ni Atty. Quilaton. "Nagtuo kami nga may sindikato nga migamit sa ngalan sa VPL aron pagpalusot sa illegal nilang transaksiyon." -- Sumpayan pa