Dugang 183 ka classrooms ang tukoron karong tuiga

Banagbanag. Naglingkod na sab si Sendo sa batong dako daplin sa lapyahan. Naglantaw sa hunasan. Daw dunay gipaabot. Kun dili mosilang ang adlaw unya moinit, dili siya mobiya dinhing dapita sa baybayon sa baryo Hinablan. Mga tulo na ka bulan si Sendo nga ingon niini.

Igo lang nakatapos og hayskul si Sendo dihang nailo siya. Nahilo sa bihud sa butete iyang mga ginikanan. Nag-inusara na lang siya kay bugtong man siyang anak. Ang gamay'ng payag sa baybayon ug sakayan ni Tatay Santos niya mao ray napanunod ni Sendo. Kamao siyang managat. Usahay mamana. Ug maglabi ang panginhas kay hilig man siya'g mga kinhason.

Mga tulo na ka bulan ang nilabay nga gikuha si Shirley sa iyang mga ginikanan. Nag-ipon sila. Apan way relasyon. Giila niya si Shirley nga iyang igsoon. Wala siyay malisya sa lawasnong kaibog sa dalaga. Apan malipayon kaayo siya kun naas Shirley sa iyang kiliran.

Nabangalan niya si Shirley niadtong usa ka banagbanag nga nanginhas si Sendo mga siyam na ka bulan ang nilabay. Ngitngit pa nga nagtaaktaak na siya sa hunasan. Nakasindol siyag tawo nga morag nag-ubo sa kalomotan. Iyang gibangon kay abig hubog nga mananagat. Apan usa ka maanyag nga dalaga iyang natataw. Way panimoot. Gidali niyag sapwang ang dalaga ug gidala niya sa iyang payag. Giilisan niyag uga nga sinina. Nanguha siyas sanina ni Nanay Pitay niya nga gipanulod nas kaban. Apan udto na lang wa gyud siya nimata.

Nahadlok si Sendo. Kay simbakog mamatay ang babaye, siyay mapasanginlan. May mga bon-og ang dalaga sa agtang, aping ug mga bukton. Apan lutaw kaayo iyang kaanyag ug kahamis sa kutis. Timailhan nga anak siya og datung mga ginikanan. Nagpakitabang si Sendo sa Barangay Kapitan ug mga tanod. Gipadala niya sa Badian District Hospital ang dalaga.

"Sendo, pangutan-a imong pasyente kun kinsa iyang ngalan kay para mabutang sa rehistro sa hospital," matud sa pangulong nars.

"Basig usa na sa mga pasaherong missing sa barkong nalunod sa Tanon Strait sa niaging semana," timang sa doctor.

"Day, kinsay imong ngan?" ni Sendo ngadtos pasyente nga naglingkod nas iyang katre sulod sa ward.

"Wa lagi ko kahinumdom kon kinsay akong ngan," sa babaye nga daw kahilakon. "Gusto ka, ako na lay mohatag og ngan nimo?" ni Sendo.

"Sige" nipahiyom siya.

"Kay gikuha man tika sa baybayon o dagat, nganlan tikag Shorely Dagatan," ni Sendo. Nakatawa ang nars ug doctor.

"Kuan na lang Shirley Honasan" matud sa pasyente.

"Okay kaayo," ni Sendo. Kay gusto na mang mogawas sa hospital si Shirley, napogos og buak  ni Sendo ang  iyang duha ka alkansiya. Bagol ug kawayan.

"Samtang nagpaabot kas imong pamilya nga mokuha nimo, pili lag asa ka estar, Shir. Sa balay bas mayor o sa kapitan sa Hinablan," ni Sendo paggawas nilas hospital.

"Ikaw may nakaluwas nako, anha gyud ko nimo," ni Shirley.

"Suma nimo," ni Sendo.

Ug gipablater niya sa pulis ug opisina sa kapitan nga nia sa iyang balay si Shirley, usa ka survivor sa nalunod nga barko. Gihangyo sab niya ang kapitan nga ipasibya sa radio, telebisyon ug mga mantalaan labi na sa  Banat News nga niay babaye nga nadagsa sa Hinablan, Badian.

Mga unom ka bulan gyud ang nilabay una nianha sa balay sa kapitan sa Hinablan ang mga ginikanan ni Shirley. Nagdalag mga papeles pagmatuod nga sila ang ginikanan. Abogado ug doktora diay ang ginikanan ni Shirley. Duna silay dalang mga litrato paggradwar ni Shirley sa elementarya ug hayskul. Siya gyud. Ug usa diay siya ka nursing student. Caroline del Mar diay iyang tinuod nga ngalan. Giprimyohan si Senado og singkwenta mil pesos sa amahan ni Shirley (Caroline). Dili unta modawat si Sendo apan gipugos gyud. Nigakos si Shirley sa pagpanamilit.

"Sendo!" may nisangpit niya. Sinati niya ang tingog. Naputol ang paghanduraw ni Sendo. Nilingi siya sa iyang luyo. Nagdagan si Caroline padulong niya.

"Shirley! Aw Caroline! Ikaw?" ni Sendo nga luhaan ang mga mata sa kalipay. "Pakuyogon ka ni papa nako sa amo. Patrabahoon ka niya sa iyang bupete. Ug himuon ka niyang bodyguard nako. Ug lipay kaayo ko sa iyang hukom" ni Caroline nga gikutasan apan mapahiyomon.

Nanghupaw si Sendo. Daw di siya katuo sa iyang suwerte. Nipasiklap siya sa kataposang higayon sa lapyahan. Nakapahiyom siya. Kay wa gyud siya masayop nga mobalik si Shirley sa paghunas sa dagat.  - Kataposan