Mora kog nabungog nga naigo sa pagtamparos ni Ricky. Labihan niyang sukoa. Nagpangagot ang iyang mga bag-ang. Nagpaminti siya.
"Wa ka tingali magdahom, no," ni Ricky pa, "nga masayran nako ang imong paghimog milagro dinhi sa Cebu?"
Wala ko motingog.
Si Ricky misugilon kanako nga nakadawat siyag text gikan nako apan sa iyang pagsabot, dili alang kaniya ang maong mensahe. Sa maong mensahe, nalakbitan kuno nako ang ngalan ni Fred. Didto nagsugod ang iyang pagduda nga naghimo akog dili maayo. Misamot ang iyang pagduda sa dihang nalangan kog tubag sa iyang pagtawag sa akong cellphone ug unya wala ko makig-estorya niyag dugay.
Pagkadako kong sayop! Nasayop diay ko pag-send sa text nga alang unta kang Fred ug ako kining na-send ngadto ni Ricky. Labihang pagkasipyata. Kun wala pa kadto mahitabo, dili unta moresulta sa ingon niini karon ang tanan.
"Tungod sa akong pagduda," ni Ricky pa, "nakahukom kong mopauli dinhi nga dili magpahibalo kanimo aron panid-an ang imong kalihokan. Ug kaganina sa imong pagbiya sa apartment, hilom ko ikaw nga gisundan. Sa Colon may misugat kanimo nga usa ka lalaki. Nanakay kamog taxi ug didto kamo paingon sa UCV Inn. Misulod kamo sa maong motel. Ang akong nakita igo nang magmatuod nga nagbudhi ka kanako."
Wala na lang ko mangatarongan. Tontohon ko pa ba gihapon si Ricky bisan aduna na siyay ebidensiya? Maong wala na lang ko magtingog.
Tungod sa maong hitabo, nakahukom si Ricky sa pagpakigbulag nako. Gikuhaan ko dayon niya sa katungod pagdawat sa iyang allotment. Kay wala na man koy ikabayad sa apartment, napugos ko sa pagpakig-live in kang Fred. Didto na siya mopuyo tipon kanako sa apartment nga akong gipuy-an.
Sa sinugdanan, malinawon, malipayon ug tonhay ang panagtipon namo ni Fred. Wala ko magbasol nga nakig-live in ko niya tungod kay gihigugma ko na man siya sa hilabihan. Apan sa kadugayan, inanay kong nailhan ang matuod nga pagkatawo ni Fred. Usa diay siya ka sadista. -- Sumpayan pa