Mga Pinay sa MU

Maingong tulo ang pambato sa Pilipinas sa umaabot nga Miss Universe Pageant sa Mexico karong umaabot Mayo 28 (Mayo 29 dinhi)- Bb. Pilipinas Anna Theresa Licaros, Miss Norway Kirby Anne Basken ug Miss Germany Angelina Glass. Ug karon pa lang gisugdan na sila og tandi.

Sa mga nagkadaiyang beauty pageant forums, dunay namahayag nga nilang tulo, si Licaros gayud ang labing lig-on kun pangutok ang hisgutan ug usa siya sa inilog sa tanang kandidata, kun ang ilang official interview maoy hisgutan. Nagkanayon ang mga kriteko nga undanon ang matag pulong ni Licaros ug dalaygon ang iyang dakong pagsalig sa iyang kaugalingon tungod kay diretso siya kun mosulti. Matud pa daw tubig sa sapa ang pagdagayday sa iyang mga ideya ug opinyon ug hayan si Miss USA ang iyang higpit nga katigi kun inutokay lang. Ug tungod kay maayo siyang makighugoy-hugoy, nag-anam kalig-on ang estado karon ni Licaros sa nagpadayon nga indigay.

Si Kirby matud pa cute ug madanihon ang tinubagan, sweet ug komedyante diin ang mga tawo sa iyang palibot nahimuot sa iyang mga gipangtabi. Apan daghan ang nakasaway sa pink gown nga iyang gisul-ob, nga kun mga bayot pay pasultihon, walay hustisya tungod maot na hinoong tan-awom si Kirby. Ingon niini usab ang komentaryo sa kadaghanan kalabot sa gold gown ni Licaros nga gikan sa Columbia. Suma pa nila, angayan nga mangayo og refund ang Bb. Pilipinas Charities ug magdali sila og palit og laing gown aron dili madaot ang nagkanindot na nga diskarte ni Licaros.

Samtang ang mga beauty pageant experts miisip ni Angelina nga labing isog nilang tulo, puno sa panahom ug walay kukahadlok nga mamahayag bahala na og unsay reaksyon sa makabati. Pagkakaron, daghan pa ang nakadayeg sa iyang mga gamit, gown, swimsuit ug make-up.