‘Chicks pero matinik’

Ang Noel identical twins nga silang Whenvy Lyn ug Whenvy Jean kinsa bunga sa pagminahalay nila ni Mommy Juvy dela Cruz (dili Flores, nga maoy namantala kagahapon), ug Daddy When Noel Sr., gihulagway nga "chicks pero matinik". Makasina ang ilang mga gipanghuptang kaanyag gawas sa ilang abilidad sa gitara.

Nahimugso sila ning kalibotana niadtong 14 sa Enero, 1992. Mag-fourth year high school na sila sa Colegio dela Immaculada Conception sa Mandaue City.

Makalingaw kaayo ang ilang pagkatabian, pagkamatinagdanon, ug ang ilang dili makabuak og basong respeto sa ilang mga ginikanan. Kauban usab kini sila sa ilang mga ig-agaw sa pagtungha sa A. Salonga nga nagsugod niadtong 2005. Nakat-on pud sila sa paghapak sa drums ug voice lessons sa una. Apan karon sa ilang gidala nga instrumento, aduna’y gamay nga kompisal si Lyn, "ingon akong mommy nga ako na lang ang mag-lead guitarist kay inconsistent kaayo si Jean. Gikan na na siya misuway og vocals, then nag-drums, maong siya na lang gyud ang gipa-bass."

Nahilom si Jean apan midepensa siya sa pag-ingon, "kay sa lead daghan man gud og kumpit-kumpit, lisoran man ko. Ganahan man pud ko’g bass kay bug-at ang dala."

Kon dili nimo sila sinati, makaingon ka nga hinhinon ang duruha. Apan luyo sa ilang katahom, daw dili katohoan nga mga maroon belters na kini sila sa Karatedo.

Maisip usab nga fashionista ang managkaluha kay kinaham kaayo nila ang makasunod sa urog pinaagi sa pagsul-ob sa nagkalain-laing desinyo sa sapot. Ilabi na si Lyn nga mahiligon sa mga bag-ong outfits ug burloloy. Buot niyang sudlan ang kalibotan sa fashion designing. Samtang si Jean ganahan motabang sa mga masakiton pinaagi sa pagtikang usab sa kalibotan sa nursing. Silang duha nagkanayon nga paborito nila ang English subject.

Sa Wuzzup Bar sa Escario pag-Hulyo 2006 unang natagamtaman sa D’Kazins kon unsa diay kining gitawag og "gig". Sa maong venue, nakaplagan sila ni DJ Ram Dizon ug maoy nag-agni kanila nga mosumite sa ilang kanta nga "Naunsa Na?" Hinungdan man gani nga nadali nila pag-record ang maong komposisyon ni James Dionson. Sangko sa langit usab ang gipakitang suporta sa ilang mga ginikanan alang sa maong kalamboan.

Sa dihang nadunggan na nila ang ilang labing unang kanta nga gipalanog sa 93.1 Smash FM, matud pa daw mora’g niulpot ang ilang mga kasingkasing. Suma pa nila, daw sa dili sila mahimotang. Gikaluhaan usab og kakulba ang ilang kalipay sa posibleng feedback sa mga tigpaminaw. Ug kon unsaon kini pagdawat sa ubang mga Bisaya rockers.

Sukad niadto, dili na maihap kon kapila na sila makapasundayag ug makaapil og mga band challenges.

"Para nako memorable kaayo ang unang Rakrakan sa dyLA last September 2006 kay mao gyud to ang pinaka-first nga among natukaran nga daghan kaayong tawo," matud pa ni Jean.

Alang kang Jogen, Jr. dili niya makalimtan ang gig kuyog ang The Agadiers alang sa usa ka Christmas Party didto sa Carcar niadtong Disyembre sa nakalabay’ng tuig. "Kay didto gyud ko naka-feel nga gihangop gyud mi og maayo sa mga fans. Daghan kaayo nisinggit nako og "idol", niya pa.

Matud niya mora sila og mga personalidad sa showbiz niadtong gabhiona kay ubay-ubay sad ang nagpa-autograph nila. "Feel namo sikat na kaayo mi adto nga time," puno ni Lyn.

Walay kabutangan ang gibating garbo sa ilang mga apohan nga kusog na kaayong mo-jam sa mga bag-ong gitimplang kanta nga gipahaom sa Bisaya rock genre. Matud pa ni Mommy Melit, "pugong sab sa edad" nga ginuntan niya sa iyang bahakhak.

Samtang si Daddy Jogen, nagkanayon nga "daw sa motulo ang iyang mga luha nga magsud-ong sa iyang mga chikiting nga nagpasundayag atubangan sa mga katawhan nga mga kulba pud kaayo’g suportang gihatag ngadto sa mga bata."

"One time giingnan mi sa organizer nga wala’y talent fee kay for a cause daw ang event. Okay ra kaayo namo kay motabang man pud mi samtang mo-share sa ilang mga talents ang among mga anak. Basta makaya lang sa mga bata," niya pa nga wala’y pagpanumbaling sa ilang mga kahago.

Ang D’Kazins kasamtangang nagbuhat sa ilahang full blast nga album karon nga bakasyon pa ang mga bata gikan sa ilang pagtungha. Ug giklaro ni Mommy Melit sayo ning semanaha nga aduna na’y "working permit for minors" ang mga bata.

Niadto ang magtiayon sa Department of Labor and Employment tungod sa mga hulga nga naabot nila nga may mga NGOs na nga nagsugod pag-kwestyon kon may mga working permits ba ang mga batan-on sa ilang pagsulod sa natad sa local entertainment.

"Nahikay na ang ilang mga WPMs so ang mga cause-oriented groups wala na’y rason pa para maglangas o magbuhat og isyu batok namong mga ginikanan sa D’Kazins," panapos ni Mommy Melit.