Ang bunga ni Mommy Merlita "Melit" Chan-dela Cruz ug Daddy Jogen dela Cruz, Sr. mao silang Mary Adrean (tambolista) ug si Jogen, Jr. (keybordista). Kauban nila sa banda ang ila ra pud nga mga ig-agaw – ang identical twins nga sila si Whenvy Lyn Noel (lead guitar) ug si Whenvy Jean Noel (bass guitar) nga mga bahandi sa magtiayong Juvy Flores ug Wilfred When Noel, Sr.
Sa Kinalumsan, dakbayan sa Lapu-Lapu nanagtapok ang mga mag-agaw sa usa ka compound kauban ang ila ra usab nga mga kabanay. Wala pa sila mangatawo ning kalibotana, dinhi na nakabasi ang pamilyang dela Cruz.
Si Mary Adrean kon May An natawo niadtong petsa 21 sa Nobyembre 1993 ug iyang manghod nga si Jogen, Jr. gihimugso niadtong ika-6 sa Oktobre, 1996. Silang magsoon nanagtungha sa San Roque Child Development School sa Liloan, Cebu. Karong umaabot abli sa klase, ana-a na sa ikaduhang ang-ang sa high school si May An. Samtang si Jogen, Jr. naa na pud sa siksto grado.
"Manggiuwawon kaayo na sila, maong nakahuna-huna mi nga patunghaon sila sa A. Salonga School of Music kay para makuha-kuhaan gamay ang ilang pagka-shy," pasiunang paambit ni Mommy Melit atol sa gipahigayong pakighinabi sa mismong panimalay sa mga dela Cruz.
Tuod man, ganado kaayo ang mga bata sa permero. Pero sa dihang nagkadugay na, gidaog na pud sila sa kakapoy. Ilabi na si Jogen.
"Maghilak na siya magpadulong sa iyang piano lesson. Andaman na lang gud na siya og chocolates sa iyang instructor nga si James Dionson para lang malingaw," puno pa ni Mommy Melit. Nagpanuigon pa og nuybe anyos si Jogen niadtong higayona.
Si Dionson nga keybordista sa laing Bisrock band, Makadawa, maoy magtutudlo nila sa A. Salonga. Siya nibarog isip mentor sa D’Kazins.
"Dugay man sad gud mahuman iyang piano lesson, then maulahi na siya basta manglakaw na mi. Maong mohilak na siya," saysay pa sa iyang mga ig-agaw nga nahimuot nga naghinumdum may duha na ka tuig ang nakalabay.
Tungod sa pagpakita niya og kabugnaw ngadto sa iyang leksyon sa piano, nga gisubhan sa kalaay, gipabalhin na lang siya sa lesson sa keyboards. Nga matod pa ni Mommy Melit "mas enhanced ug mas daghan ang piece nga mahimo sa pagkat-on niini." Tuod man, gihangop niya ang pagka-interesado sa keyboards tungod kay mas makalingaw kini.
Si May An pwerte gyud nga pagkahilomona. Manggiuwawon sab kaayo siya, apan mapahiyomon. Ang iyang emosyon anha ra niya tanan ipabuhagay sa pagdakol-dakol sa drums. Apan iyang gipasabot nga kalma ra siya motambol. Pareha sa iyang mga kinaham nga mga foreign drummers nga natural ra mo-strike sa drums. "Mas ma-feel man gud nimo ang music if kalma ug natural lang ka," pasabot ni May An.
Susama sa ubang nanagsugod pa sa ilang pagka-musikero, miagi usab og kalisdanan kining mga batan-ona sa mga hugna sa ilang pagtoon sa ilang tagsa-tagsa ka instrumento. Apan tungod sa pagkahilig gyud nila sa musika, naba-id ra gyud ug nahanas ang ilang mga talagsaong potensyal o talento sa pagpanukar.
Dili pud sila mga basta-basta lang nga mga batan-on. Ang managsoon mga blue belters usab sa Aikido, usa ka Japanese martial arts.
"Mga achievers gyud noon ni sila," dungag nga pagsugilon ni Mommy Melit. "Kay si Jogen, daghan na kaayo’g nakuha nga trophies sukad pa sa iyang pagka-nursery. Nakadaug na siya og Little Mr. srcDS ug inubanan kini sa paglangkat niya sa titulo sa Best in Talent.
"Karon sab, siya pud ang nakakuha gihapon sa titulo isip Mr. Talent ug Voters Choice Awards sa ilang program nga Star Teen 2007," matud ni Mommy Melit.
Sa miaging buwan, atol sa ilang recognition day, si Jogen ang nahatagan sa pasidungog isip Boy Scout of the Year sa San Roque. Si May Ann usab permi lang makakuha sa Most Behave sukad pa sa una ug naa sab siya’y Allegiance Award.
Ang paborito nga subject ni May An mao ang Christian Living. Natakdo usab kini sa iyang pagkamaayong bata ug dili hambogera bisan pa man sa kaharuhay nga iyang natagamtaman.
Parehas sa ubang mga batang lalaki, si Jogen malingaw og kitoy-kitoy sa iyang mga kamot pagsulbad og mga Math problems. Apan dili ikalimod nga nakasimba kini siya sa pagka-business minded sa iyang Daddy Jogen, Sr.
Gawas sa musika, mahiligon usab si May An sa pagdibuho. Kini maoy sukaranan sa iyang damgo nga mamahimong usa ka arkitekto ugma damlag. Samtang si Jogen misugilon nga gusto niyang mahimong piloto.
"Hala dong, unya tag-as ra ba ang dawaton basta mag-pilot," sungog ni Mommy Milet nga nagkatawa pagkadungog sa gibutyag sa iyang anak nga daw sa nasawot ang gitas-on.
Ugma puhon, ang Noel twins. Unsay ilang pangandoy sa kinabuhi ug unsa pa ang ubang detalye nga wala ninyo mahibaw-e?