Metal Instinct: Bayhon sa agresibong musika

Hilabihan na gayud ang kasibot nga gihatag alang sa paningog nga Bisaya rock tungod kay gipanghingusgan pa pag-ayo ang pagpanganaw-kanaw ning matang sa musika. Kahinumduman kaniadto nga dili pa kini kaayo kusog tungod kay wala pa kini kahatagi''g igong pagtagad sa bagang duot sa katilingban. Ingon man kuwang pa ang mga namarog nga banda nga may igong materyales nga sarang ikapasigarbo.

Usa ka banda nga mibarog karon sa hagit sa panahon nga mamahimong progresibong rakista mao ang Metal Instinct. Usa sila sa mga bag-ong pundok sa mga Bisaya rockers nga nangandoy pinaagi sa ilang musika nga makapalabang og usa ka mapuslanong mensahe alang sa kausaban sa daghang mga hiwing aspeto sa katilingban.

Ginamit ang impluwensya sa mga bandang nagtuboy sa heavy metal music, napili usab nila ang pangalang Metal Instinct - lig-on, bug-at ug gahi daw puthaw. Susama sa ilang gibarogang agresibong panahom diha sa ilang mga kanta.

Astig ug bug-at ang pagkahulagway sa ilang mga kanta nga gipalanog karon sa 93.1 Smash FM. Ang maong mga kanta nag-ulohan og "Gubat" ug "Poli-tikas". Ang Gubat nanghinaway sa atong pangagamhanan nga nag-usik-usik lang sa buhis nga gipamalit og bala alang sa pakigbuntog sa kaaway, inay atubangon ang mas halapad nga suliran sa pagpangempleyo ug kakabos. Samtang ang Poli-tikas naghambin og pagmahay sa mga politiko nga buot magpatuboy kauban ang panaad nga manerbisyo publiko, apan mga tikasan ug mga kawatan diay sa bahandi sa nasud.

Miusbong ang ilang pundok niadtong Hulyo sa miaging tuig diin aduna kini upat ka mga miyembro. Sila mao sila si Christian Arroyo sa vocals, usa ka lumad nga Ozamiznon; si Samuel Villarta sa bass nga usa ka Mandauehanon, ug ang managsuong Philamuel Paul ug Leif Lormann Tirariray sa guitar ug drums, nga kasamtangang residente sa Tipolo, Mandaue City. Gisaysay ni Leif nga ang ilang amahan taga Camiguin, samtang ang ilang inahan taga Bohol. Nagpasabot og kahingpitan sa ilang pagka-Bisayang dako.

Atol sa pakighinabi kang Paul Tirariray sa dihang siya mihapit sa 93.1 Smash FM, nasayran nga ang ilang mga ginikanan aduna diay pagkahilig sa musika ug tungod niana dili gyud ikatingala nga sila sab matugkan sa maong interes.

Ilang inspirasyon ang mga bandang Metallica, System of a Down, Killswitch Engage, Lifehouse ug ang Creed. Sama sa ubang mga Bisrock bands, nagplano usab sila nga makalusad sa ilang "self-titled debut album" nga adunay napulo ka mga kanta - Aborsyon, Desperado, Trapiko, Tikasan, Intriga, Polusyon, Abusado ug Sosyalera. Ang ilang mga komposisyon nagtuki sa mga isyung may kalabotan sa atong palibot sama sa pangurakot, pamolitika, polusyon ug uban pa.

Pinaagi sa maong mga kanta nasigpatan ang kaikag sa Metal Instinct nga magmugna og mga kantang agresibo alang sa pagtawag atensyon o pagpahigmata sa mga katawhan nga tutokan ang dagway karon sa atong katilingban. Nanghinaut ang Metal Instinct nga masabtan sa kadaghanan ang ilang atake batok sa nag-alintabong mga panghitabo sa nasud nga gigamhan sa kasamok.

Wala''y straight nga aktibista sa grupo pero dili sad mi ganahan mosulat og mga kantang wala''y klarong mensahe. Kay para unsa man tuod ang among music? Songs should always come with sensible messages, sensitive to culture," matud ni Leif sa usa ka pakighinabi pinaagi sa telepono. Si Leif maoy nagsulat sa hapit tanang tracks sa Metal Instinct, kaabag ang iyang igsoon nga si Paul.

Kabahin sa paningkamot karon sa Metal Instinct nga makahinay-hinay og painit pa''s mga pagdasig nga ang mga katawhan magpadayong magpakabana labi na sa nagdanga-danga nang bugnong lugaynon. Usab, padayon nga magsukit-sukit ug mamulso sa mga panghitabo batok kinaiyahan nga angay unta natong panalipdan kay nakakita na kita sa kabangis niini kon maoy maningil og pautang. Padayong makigbisog alang sa paghatag og kusog sa demokrasya, ug magsalibay sa kamapasagaron nga maoy makapukan sa atong kagawasan.

Gipalanog nila ang agresibong musika isip medyum sa paghulagway sa atong mga kahiusahan ug pagkapukan, kalig-on ug kahuyang, ang atong mga pagpakabana ug pagkuwang. Kining matang sa musika ang gikinahanglan sa atong katilingban. Matang sa musika nga molangkat sa mga taptap sa atong mga mata aron ipunting kini kon unsa ang atong mahatag nga kaayohan sa nasud ug motangtang sa gapos sa gibakliad tang mga prinsipyo aron gamiton kini sa pagtuboy sa matuod nga diwa sa kaangayan, kamatuoran ug kahiusahan.