Ang albularyo sa sityo Libas

Masulub-on si Auring nga nag-apong kang Vamvam, iyang anak. May kabalaka nga mikupog sa iyang kaugalingon. Naluoy siya sa kahimtang sa siyete anyos niyang anak. Luspad ug luya na kaayo ang bata. Wala madugay misulod si Satur sa lawak. Namatikdan niya nga nag-ilis ang iyang bana og limpiyong sapot.

"Molakaw una ko, Auring," matud ni Satur nga mipasiklap ngadto sa ilang anak nga nagpiyong ang mga mata samtang naghigda.

"Asa ka man diay?" sukit ni Auring.

"Sungkoon nako si Ingko Talino," laktod nga tubag ni Satur.

"Ang albularyo sa Sityo Libas?"

"Oo. Hangyoon ko siya nga iyang tambalan si Vamvam."

"Motuo ka ba diay og albularyo, Satur?"

"Dili gyod unta ko motuo, Auring. Apan niining higayona mamasin na lang ta. Nag-ungaw sa kakuyaw ang kinabuhi sa atong anak."

Wala motingog si Auring. Mipitokpitok ang iyang mga mata. Unya miungot ang iyang panan-aw ngadto sa ilang anak nga maluyahong naghigda sa lantay.

"Ikaw nay maantigo sa atong anak," gikan ni Satur. "Dili ko magdugay. Kon mosanong si Ingko Talino, kauban ko na siya sa akong pagpauli."

Dayon nanaog si Satur. Nahibilin si Auring sa lawak nga nagbantay sa ilang anak.

Dul-an na sa duha ka semana nga naglubog si Vamvam sa banig. Nakatulon kini og peso nga kuwartang biyugol samtang nakigdula sa iyang mga higala. Dangtan og pila ka adlaw, inanay nga nagluya si Vamvam. Dili na ganahan mokaon ang bata. Nag-anam usab kini kaluspad.

Dad-on unta nila sa doktor sa lungsod ang bata. Apan wala silay kuwarta nga ikabayad sa mananambal. Kabos lang sila, lugos ganing makakaon katulo sa usa ka adlaw. Midangop sila sa mga ginikanan ni Satur aron manghuwam og kuwarta apan utro sad nga walay kangho. Mao kini karon nga naproblema kaayo sila sa kahimtang sa ilang anak nga nakatulon og peso apan dili nila kapadoktoran kay walay kuwarta. Ug tungod lagi sa naghingapin nga kahingawa sa kahimtang sa bata, si Satur nakahukom nalang nga modangop sa usa ka paagi sa pagtambal nga walay kasegurohan.

Si Auring nakombinser na lang usab nga husto ang gibuhat ni Satur. Wala na silay laing kadangpan kondili ang pagpamasin. Nanghinaot na lang sa hilom si Auring nga magmalamposon ang albularyo si Ingko Talino sa pagtambal kang Vamvam. Nabaniog man usab kining maong albularyo nga maayong laki sa panambal nga gamitan og orasyon. Motambal kini sa bisan unsang sakit ilabi na kanang mga binuhat nga nasudlan og daotang espiritu.

Nahibalik si Satur sa ilang pinuy-anan nga kuyog na ang albularyo nga si Ingko Talino.

"Hain man ang masakiton?" nagkanayon ang albularyo.

"Naa ra, Ingko Talino," ni Auring nga mitudlo kang Vamvam nga nagpiyong lang gihapon nga naghigda. "Tambali intawon siya, Ingko, maluoy ka. Luwasa intawon siya."

"Unsa man diay nahitabo niining bataa?" sukit sa tambalanan.

"Nakatulon lagi siyag peso nga kuwarta, Ingko."

"Kanus-a lang kini mahitabo?"

"Dul-an na sa duha ka semana, Ingko."

Miyangoyango ang albularyo. Gitutokan niini ang bata. Namatikdan nila ni Satur ug Auring nga maukiton nga tinan-awan sa albularyo sa ilang anak.

Gihimulsohan ni Ingko Talino si Vamvam. Taudtaod gibuhian sa albularyo ang kamot sa bata.

"Unsa man, Ingko?" ni Satur pa. "May paglaom pa kaha nga maluwas ang bata?"

"Dili man problema kanang iyang kahimtang," sa albularyo pa. ''''Adunay koy isugyot ninyo."

"U-unsa man kana, Ingko?" Si Auring ang nangutana.

"Puslan man nga nakatulon og kuwarta ang inyong anak," sa albularyo pa, ''''himoa na lang siyang alkansiya."

Nagkatinutokay sila si Auring ug Satur sa ilang nadungog. Dihang nakalakaw na ang albularyo, nagsabot ang magtiayon kon unsay ilang buhaton aron makakitag igong kuwarta. Kinahanglang madala nila sa doktor ang ilang anak. - Kataposan