Kalainan ni Ryan ug Renan sa Indephums

(Editor's Note: Kagahapon atong gisaw-an ang istorya sa magsuong Renan ug Ryan niadtong mga bata pa sila. Nakatawa ta sa ilang pagkasiaw, nahibaw-an nato nga taslakan pod diay sila og abat ug atong nahibaw-an kinsa nilang duruha ang sungogan ug milayat sa bintana aron mokagiw. Karon ning ikaduhang bahin sa artikulo, ila-ilaha pa ninyo kining magsuong "astig" nga mga sakop sa Indephums).

Resourceful gyud matud pa nga pagkatawo si Ryan. Diha gani higayon nga iyang gibuhat og knapsak ang usa ka paresan nga karsones nga maong nga wala na unta'y gamit. Nitrabaho usab siya isip service crew sa usa ka pamosong fast food chain aron makatigom.

Atol sa pakighinabi sa panimalay mismo sa mga Cuizon nasayran nga "very close gyud si Ryan sa iyang lola. Paborito kaayo siya tungod kay natural na niya ang pagka-sweet ug pagka-loving". Naputol ang maong kasuod nila sa iyang Lola Nora nga inahan ni Papa Rene sa dihang ni-migrate na sa US ang iyang apohan. Sa laing bahin, ang tawag sa ilang lola kang Renan "bulingit" ug wala kini magustohi ni Renan hinungdan man gani nga dili siya suod sa iyang lola.

Aduna la'y kutay ang duruha tungod kay si Ryan human sa iyang pagbisita sa balay sa iyang lola mouli man nga dala ang mga tsokolate ug mga karmelitos alang sa iyang manghod nga si Renan.

Mabantayan gyud nga bisan matig-away ang duruha, mobati gyud si Ryan alang sa iyang manghod. Sa kasamtangan, dili lang dugo ang naghugpong kanilang duha kondili ang ilang sobra na sa duha ka dekadang panaghinigalaay.

Gipadayag sa duruha nga managlahi ang ilang gusto sa babaye. Mas gusto ni Renan ang mga babayeng tag-as og buhok, cute, simple, matinud-anon ug mapinanggaon. Nasayran nga nagplano siyang magminyo mga usa pa ka dekada gikan karon. Kana kon matagbaw na kuno siya sa banda-banda.

Samtang si Ryan hugot nga nagtoo nga ang kaanyag magsukad paggilaw sa kinahiladman sa usa ka babaye. "It really doesn't matter how she looks in the outside. Nya mas gustohon nako nga close family sad siya parehas namo, naay dakong kahadlok sa Ginoo, ug masinabtanon," niya pa.

Utokan si Ryan. Permi siyang ma-apil sa honor roll sa dihang siya nagtungha pa. Samtang si Renan mas mahilig sa sayaw kaysa magtoon sa iyang mga leksyon. Gihiusa sa musika

Wala lang damha nilang Mama Fe ug Papa Rene nga mamahimong kabahin sa gihangop nga mga banda sa Sugbu ang ilang mga anak. Nagsugod ang pagbanda sa duruha pinaagi sa Orbit Jerk, sa dihang si Renan pa ang vocalist. Samtang si Ryan napaladman ang interes sa pagbanda pinaagi sa Stonestomp isip vocalist usab. "Mag-practice mi, mag-jam-jam. Then if mabakante ang drums, mosuway sad kog hapak-hapak," ni Ryan pa.

Ug didto nagsugod ang mga gagmay'ng lakang nga nahatod sa dinagkong layat sa natad sa panukar. "I do combine different techniques sa akong drumming like rumba, jazz, rock and blues". Tulo na ka tuig karon sukad sa pagdakol-dakol ni Ryan ug mao kini ang nakapalutaw sa ubang song arrangements sa Indephums - ang makabungog niyang drumplay.

Samtang si Renan niangkon nga dako ang impluwensya ni Evert nga gitarista sa Stonestomp sa paglambo sa iyang abilidad sa pagtukar sa gitara. "Sa una magtan-aw raman ko niya, then ni-try ko og borrow og acoustic sa akong lain nga friend. After ato, sige nako og self-study ana, dali raman pud ko nakakat-on," niya pa.

Nagpanuigon siya niadto og 18 anyos sa dihang iyang nabatyagan nga mas gusto niyang tun-an ang mga istilo sa pagkuskos sa gitara kuyog ang "thundering roll of the drumplay" sa iyang maguwang. Sa bakante nga oras mag-atubang sila og tagik og kanta ni Ryan. "Wala pa mi sa banda hilig na gyud nako mag-compose og mga meaningful og reality-based songs," matud pa ni Ryan.

Iyang gihimong pananglitan ang "Hukom (Suya!)" nga kabahin sa ilang Extended Play album.

Labing una nilang gig nahitabo sa Basak Cabreros niadtong 2005 may igong gilay-on gikan sa ilang pinuy-anan sa Sunrise Village sa Pardo. Lingaw na kaayo sila sa maong higayon nga nakapasundayag bisan pa man og wala pa kaayo'y makasakay niadto sa ilang mga kanta. "Snack lang or tagsa ka botelyang pabugnaw, fights na nga reward that time," paghinumdum ni Ryan.

Alang kang Renan, "most memorable" ang gig sa Oslob kauban ang Missing Filemon ug Aggressive Audio tungod kay mga Bisrock pioneers ang ilang naka-jam niadtong tungora. Ug nga mao usab kadto ang labing layo nilang naabot aron magpasundayag. "Mora sad mi'g celebrity that time. Naa pa mi kaugalingon namong mga lodges nga didto mi gi-billet samtang naghuwat mi's among turno makapatong sa entablado. Mora sa'g nag-tour," ni Renan pa nga nahimuot sa maong kasinatian.

Si Ryan nakahinumdum sad nga ang Sinulog gig sa Parklane Hotel maoy unang higayon nga naka-jam niya ang usa sa mga bug-at nga local band, ang Hatemail nga English ang tirada. "Dili jud mi katoo nga kami ra ang Bisrock nga band ngadto and then jam to the max pud kaayo ang crowd that moment," panapos ni Ryan.