Sadsad sa "Street Bit"

Gilangkuban lamang sa tulo ka sakop sa sinugdanan, apan wala magdugay miabot na ang miyembro og pito. Sila mao ang dance group nga nagtawag sa ilang pundok og " Street Bit" gikan sa barangay Subangdaku dakbayan sa Mandaue. Natukod niadtong Mayo otso sa milabay nga tuig, ang Street Bit inanay na karon nga mikulit og ngalan diha sa natad sa sayaw diin makauban na usab nila og gig ang pipila ka mga sikat nga dance groups sa Sugbu, matag karon ug unya. Usahay makita sila diha sa Gaisano Main nga makig-showdown sa uban pang mga grupo.

Ang "Street Bit' nahimugso gumikan sa nag-aliwaros nga kagustuhan sa mga sakop niini nga maugmad ug maamomahan ang ilang tinaguang potensyal sa pagsayaw. Buot nila nga ang maong gasa gikan sa Ginoo nga potensyal, mapalambo aron mapaambitan pinaagi sa paglingaw sa kinabag-an. Gilangkuban ang maong pundok sa mga managhigala nga sila si Dennis Ostria, Roque Tabio, Roberto Torrejos, Ivan Carmelotes, Kevin Macasero, Christian Belacsi ug Belito Añasco.

Personal nga mibisita ang pundok sa buhatan sa Banat Hugyaw niadtong Lunes sa hapon ug mipaambit nga nakatabang ang ilang pagsayaw-sayaw nga madungagan ang ilang pagsalig sa publiko, sa ingon duna na silay katakos nga makig-atubang sa publiko. Apan luyo niini, nagpahipi usab ang problema nga kasagarang masinati sa mga pundok nga nagsugod pa lamang sama kanila-ang kakuwang sa pundo nga ipamalit og costume.

Hinoon gipalanog nila nga kanunay ra kining mapangitaan og pamaagi, sama sa pagsalmot og dance contests. Si Roque Tabia, sakop ug tigpamaba sa pundok mitug-an nga dili pod malikayan maglalis sila diha sa ilang mga ensayo ilabi na kon managlahi ang dance steps nga buot nilang paambitan.

"Usahay maglalis mi parti sa dance steps pero mag-uli ra man dayon kon ugaling makauyon ang tanan sa dance steps nga gi-share," ni Roque pa.

Ang "Street Boys" maoy ilang idolo, ug ilang giangkon nga motan-aw sila sa videotapes sa maong pundok diin adto usab sila magkutlo og dance steps usahay.

"Motan-aw ra man mi og salida sa Street Boys, unya kon naa mi kit-an nga bag-o nga steps nga wala pa sa uban nga grupo amo dayon kuhaon," nagkanayon sila.

Walay rason nganong "Street Bit " ang tawag nila sa ilang pundok, gawas lang nga ganahan sila nga maminaw niini busa nausa ang ilang hukom. Pagpasensya, ilabi na sa pagpangita og gigs matud pa nila maoy labing gikinahanglan sa buot magtukod og dance group. Kinahanglan usab nga mosalmot og mga indigay aron mailhan gawas nga mabansay ang mga sakop niini. Suma pa nila, diha sa pag-apil og contest makita usab ang mga sayop, ug makakat-on ka aron dili na kini sublion pa sa sunod nga pagsalmot.

Alang sa imbitasyon makontak ang "Street Bit" sa numero, 09216718132

* * *

Duna ba kamoy dance group apan wala mahatagi og dugang exposure? O duna ba kamoy paborito nga dance group nga buot ninyong masayran ang istorya sa ilang pagpaningkamot? Text na ngadto sa 09286252596 o ba kaha tawag na sa 2531276 ug 2554263, pangitaa si Ryan Mark. Kadto lamang personal nga mobisita sa among buhatan ang makabaton og higayon nga makalugwa dinhi sa Banat Hugyaw By Reuest.