‘Ayaw Ipalusot Kandidatong Shaburakot’

Mapasalamaton kaayo ko sa organizer sa 50th commemoration sa pagkahagsa sa abyong Mt. Pinatubo nga nakaingon sa hinanaling kamatayon ni kanhi Presidente Ramon "Monching" del Fierro Magsaysay. Nahagsa ang abyong Mt. Pinatubo diha sa bukirang bahin sa Balamban niadtong Marso 17, 1957.

Sa nakalabay’ng Sabado, Marso 17, mapasalamaton ko kay naglanog-lanog sa kinapungkayan sa Mt. Manunggal ang tinagubtob sa mga kantang Bisrock nga gipasikat sa bandang Avlish nga lumad nga mga Balambanon. Mabulokon ang mga kanta sa Avlish tungod kay kini may panawagan man sa pag-"Bangon sa Sugbu". Gawas sa Avlish, nanganaw-kanaw ilawom, taliwala ug lagbas sa gabon nga miputos sa camp site ang mga kanta sa Aggressive Audio, Missing Filemon ug Mantequilla. Nianang pagkagabii, usa sa duha ka show bands nga gikontrata sa San Miguel Corporation alang sa pagdalit og kalingawan ni-cover sa "Senior Citizen". Matud pa’s vocalist, "para ni sa tanang Bisrockers." Ug sa dihang nagkagulkol na ang tuno sa intro sa Senior Citizen, nahugyaw na pagpanagan ang ubang diha lang unta nangiyugpos sa ilang tagsa-tagsa ka tents kay inay magtikungkong tungod sa kakamig sa Mt. Manunggal nisadsad na hinoon sa nagkalapok nga yuta diin gipahigayon ang usa ka diskoral sa barangay Magsaysay.

Nakapaagas gyud ko’s akong luha nga nakadungog sa gibuhiang pahinungod sa vocalist sa maong show band. Emotional kadtong tungora para nako kay sa nakalabay’ng trek nga akong gihimo niadtong 2006, daghan ang nitutok sa akong t-shirt sa dihang nakaguho na ko’s akong tent. Sul-ob nako ang Bisrock t-shirt. Akong nabantayan nga duha lang mi kabook nga nagsul-ob niadto ug bisan asa mi moadto daghan ang manutok. Nalahugay sa akong huna-huna ang pagduda nga may dala kadtong kuryosidad kon asa mapalit ang maong t-shirt, o kaha may panaway nga naglimin diha sa mga hunahuna sa nagpasiplat nako kay lagi niadtong panahona nagkamang pa daw puya ang Bisrock ug daghan ang nag-atang nga mapukling ang among nasugdan pagtanom – ang Bisrock movement – kauban ang mga haligi niini nga silang Marit Remonde, DJ Ram ug Bré Ambungan. Sa akong pagbalik pagkatkat niadtong Sabado sa Mt. Manunggal, ako nang "kapikas sa dughan" ang nagsul-ob sa maong Bisrock t-shirt ug sa ingon napasa na nako ang impluwensya sa lain. Ingon sa pagpasa og usa ka yawe aron ablihan ang mas halapad pa’ng pagdawat sa komunidad sa usa ka butang nga "klarong inato". Mao usab ang akong gibati sa dihang misuliyaw ang mga tawo sa dihang gi-cover sa maong banda ang Senior Citizen kay akong nabatyagan ang pagtamod sa maong banda sa unsa’y gustong madunggan sa mga tawo niadtong tungora.

Sulod sa pito ka tuig nga pagbalik-balik nako sa Mt. Manunggal, naglaom ko nga makakita nga molambo ang konsepto sa "responsible mountaineering and mountain tourism" sa Sugbu. Apan pakyas ko kay nagkadugay nagkadaghan ang mga nangapil nga wala gani makahibalo kinsa ug unsa ang tampo ni Magsaysay sa Philippine governance. Labi na gyud og unsa ang iyang gibiyaang "legacy". Nisamot pa nga duna’y mga adventure racers nga namangga namo sa bakilid nga bahin sa maong bukid samtang kami naningkamot nga makaabot sa pangpang aron makakuha og mga hulagway. Labaw pang nagsipat ang ubang mga campers – nga dili na kasagaran mountaineers kundili mga picknickers na – sa pagpataka lang og panglabay sa ilang mga sagbot. Pero karon ako nang nasabtan kun nganong gipili pa nakong mobalik sa Mt. Manunggal bisan naglagat ang kagara sa ubang mga mangatkatay. Kini tungod kay nakita nako ang kalig-on sa Bisrock Movement, usa ka tamparos, sagpa, o tampaling sa mga tawo nga nag-ingon taman ra unom ka buwan ang pag-uso sa Bisrock kay usa lamang kini ka urog. Kalooy sa Ginoo, magduha na ka tuig sukad nako gisugdan ang pagpanuki-duki may kalabotan ang Bisrock ug wala pa’y usa ka Rakrakan nga gilangaw.

Sa nakalabay’ng sibya sa "BisrocKabataan", padayon ang pagdawat namo sa mga kritiko nga nagtagna (as if naa sila’y ilang makeshift bolang kristal) nga ang Bisrock malaos. Wala mi mag-ingon nga ang Bisrock dili matiguwang. Pero among gipaniguro manggungis man ang Bisrock duna kini positibong ikahatag sa atong katilingban nga ipaagi sa musika ug sa atong pagkahimanggaon sa mga butang nga simbolo sa atong pagka-Bisdak. Sama nga duna’y gibilin si Magsaysay bisan pa man sa pagkagay sa abyong Mt. Pinatubo. Kini mao ang pagkamatinud-anon. Kun matinud-anon ka sa usa ka kawsa, imong barogan kini bisan pa man "last man standing" ka na. Duna’y mga tawo ning kalibotana nga ang prinsipyo padayong dili mapalit. Bisan pa man kini makapakulob sa kaldero. Ang pagkamatinud-anon maghatod sa pagkakab-ot sa mga butang nga kanhi giisip nga imposible!

Molanday man ang "appeal" sa Bisrock sa publiko, mangapo sad kini’g nagkadaiyang genre sama nga kini anak sa usa ka matang sa musika nga nitadlas sa nagkalain-laing suok sa kalibotan. Karong Sabado among ipakita nga ang Bisrockers dili lang sa kanta nahugpong. Napalig-on kini tungod sa katuyoan nga makatampo og kausaban pinaagi sa pagbatok sa mga sistema nga nakapaut-ot ug samot sa atong kahimtang. Buot ipalanog sa mga batan-on nga nagkinahanglan sila og reporma sa edukasyon. Kanang klase sa edukasyon nga gikinahanglan sa unsa mang mga industriya nga nagtukmod sa pagpagana sa mga pamatigayon dinhi. Buot isiyagit sa mga batan-on nga kun padayon ang padrino system (patronage politics) dinhi, ang mga nakasagbay lang sa luwag sa mga politiko ang pirming mabulahan kay unang mapisikan sa mga sobra-sobra sa gikurakot gikan sa panudlanan sa bahandi.

Pasiugdahan sa Dilaab Foundation ang usa ka concert-forum nga may ulohang "Ayaw Ipalusot Kandidatong Shaburakot". Usa ka dosena sa mga bandang Bisrockers ang modalit og mga kantang makapaukab sa atong mga hunahuna ug maghatod sa atong pagka-amgo nga kun padayon kitang pagahong sa kasamtangang sistema sa piniliay, makawang ang atong mga paningkamot kay ang mga ambisyoso, wala’y igong kwalipikasyon, mga naghalhal, mga kawatan ug mga limbongan mao la’y mag-ulog-ulog nato nga bugtian og salapi ang atong katungod nga makapili kinsa ang mamuno sa atong komunidad. Sa ingon dili na maputol ang ilang pagkaharuhay, ug kita padayong mag-ilaid sa atong pagkamusimos. Padayon sab nga mahimong pinaka-corrupt ang Pilipinas sa mga surveys nga ipahigayon. Ug padayon ang kadaghanan nato sa ilang pagka-ipokrito nga mangutana pa nganong naglukdo kita sa maong bansagon.

"Many young people are disillusioned by our current political climate. Informal surveys show a significant number of young people not planning to vote. This disillusionment is understandable. Our current political culture is akin to a diploma mill: just about anyone can gain entry and even the most unfit graduate with honors," matud pa ni Father Carmelo Diola, ang overall coordinating steward sa Dilaab Movement.

Hinungdan man gani nga nahimugso ang "Ayaw Ipalusot Kandidatong Shaburakot" aron makaila ang mga mamotaray kun unsay mga puntong angayang sagopon sa pagpili og kandidato. Kini tungod kay may mga kandidatong angayan nang hunosan ang ilang pagkamangtas sa pagpahuyot og ginadiling drogas. Gani may mga kandidatong ang gigamit nga pundo sa ilang kampanya mao ang "drug money", mga gusto magpapili aron tibawason pa ang tiniti sa kaban sa nasod ug lungsod. "Such candidates are anti-life," pahimangno ni Diola.

Ang proyekto ilusad pinaagi sa concert-variety show nga diin mohalad og mga kantang may pagtulun-an ang Kabobo, Fervent, Aggressive Audio, Mantequilla, Indephums, Phylum, Glass of Dirt, Agipo, Missing Filemon, Assembly Language, Agadiers ug What’s The Frequency?May mga dancers ug artists nga mopasundayag usab atol sa maong kalihokan.

May ipahigayon nga multi-media presentation ug ingon man ang magsusulat sa lumpinid nga "12 Little Things" nga si Atty. Alex Lacson mohatag og hamubong pagbatbat may kalabotan sa usa ka dosenang pamaagi nga ang Pinoy makatabang sa pagpahapsay sa katilingban nga iyang gitikaw-tikawan.

Ang Dilaab Movement usa ka "volunteer-driven, Church-based movement for a transformed Filipino nation through heroic Christian citizenship," panapos ni Fr. Diola.

Mahitabo ang maong concert-forum diha sa Mabolo Parish Church parking lot, 8 pm hangtod 10 pm karong Marso 24 puhon. Ang tiket mapalit sa tag-P20 diha sa gate. So, kitakitz!