Pagbidlisiw na ni Roxanne

Inig bukas sa Wowowee karong udto, maaninaw na ang labing bag-o nga co-host ni Willie Revillame, busa Tres Marias na ang tukmang itawag kanila sanglit duna nay tulo ka mga babaye nga mogaray-garay sa inyong pagpaniudto samtang nagtan-aw og telebisyon. Siya walay lain kondili ang 21-anyos nga si Roxanne Guinoo, cover girl sa Maxim Magazine karong buwana ug ang binuhat nga gikagubtan ug gidayeg isip mala-diosa nga nilalang sa iyang pag-pasexy sa White Castle billboard. Niadtong Huwebes gihimo na usab ang White Castle commercial didto sa Subic, ug makita na sa telebisyon pipila ka adlaw gikan karon. Wala damha ni Roxanne, ug wala mosantop sa iyang hunahuna nga muabot kining adlawa karon nga mamahimo na siyang regular host sa Wowowee. Kay matud pa niya ang malakip sa usa ka teleserye ang iyang gipangandoy nga matuman, sa ingon mahisama siya sa iyang idolo nga si Claudine Barreto.

Si Roxanne dinhi sa Sugbu kagahapon isip celebrity guest sa 3rd draw sa A million Thanks Raffle promo sa Gaisano Main, Countrymall, Balamban ug Bogo nga mga tindihan. Apan sa wala pa siya motekang sa entablado sa Gaisano Balamban ug Countrymall, nakighimamat una siya sa pipila ka sakop sa Cebu press, diin madasigon niyang gitubag ang tanang pangutana ug gihatag og katin-awan ang mga isyu, dungan sa usa ka lamiang paniudto diha sa Lighthouse Restaurant sa Mango Avenue. Kini bisan pa man og wala pa siya'y klarong pahuway sanglit 12 midnight na nahuman ang shooting niya sa commercial didto sa Subic. Gipakita pod niya ang iyang mga garas sa tuhod sanglit suma pa ni Roxanne nag-wild ang kabayo nga iyang gigamit alang sa nahisgutang commercial busa nabag-ohan siya bisan pa man tuod og gipailawom siya sa napu ka adlaw nga horseback riding training.

Gitino ni Roxanne ang taho nga migawas dinhi sa Banat Hugyaw sa milabay nga buwan, diin dunay pamahayag matud pa ang kampo sa iyang kanhi uyab nga si Joross Gamboa, nga matud pa dili na makigpares ang ulitawo kaniya sanglit dili na siya wholesome tungod sa iyang pagka-endorser sa nahisgutang imnonon.

"Narinig ko po rin yon, pero trabaho eh. At saka I made a decision na wala na kami," pong pa niya. Usa ka tuig ug pito ka buwan ang ilang relasyon ni Joross ug matud pa niya usa ka tuig pa ang milabay una nila nadawat nga wala nay paglaum nga magpadayon pa ang ilang paghigugmaay. " No communication, parang tinuldukan na namin." Pero matud niya, nagka-istorya sila ni Joross kabahin sa iyang endorsement, ug nakadayeg matud pa ang lalaki sanglit maayo pagkagama ang proyekto.

"Ang dami kong worries. Binigyan nila ako ng two weeks para magdesisyon. Kinunsulta ko si Mr. M at he assured me na hindi nila ako bibigyan ng proyekto na malalagay sa alanganin ang career ko." Gawas pa matud ni Roxanne, ang iyang pagdawat sa maong commercial wala magpasabot nga maghubo na gayud siya kundili pagpadala lang og mensahe nga gradwado na siya sa mga pa-cute nga roles. Dili niya kaya ang "todo hubad" ug wala siyay plano nga kini maoy iyang buhaton.

Busa asa man diay siya kutob kun mga movies na ang hisgutan? Tubag ni Roxanne, buot niya nga makagama og pelikula nga susama sa "Kailangan Kita," sa iyang Ate Claudine. Pwes walay problema niya ang "torrid kissing" sama sa kang Claudine ug Aga Muhlach sa maong pelikula? " Okay lang po basta si Kuya Piolo (Pascual) ang kahalikan ko," nagkatawa niyang tubag. Dili siya mutuo nga 'bayot" si Piolo apan kun tinuod man gani kini, dili kini makaiban sa iyang pagdayeg sa aktor.

Usa ka tuig lang ang kontrata niya sa ilimnon karon nga gi-endorso sanglit duna silay ipahigayon nga nationwide search alang sa musunod nga White Castle Girl. Apan aminado siya nga karon pa lang positibo na ang dagan sa iyang career tungod sa maong produkto. Ang iyang gihuna-huna na lang mao nga unsaon niya nga magmalungtaron siya bisan pa man og kada adlaw dunay bag-ong nawong nga mulugwa sa showbiz. Hinoon wala siya mahadlok tungod kay kun kaniadto wala siya magpakawa sa paglaum dihang hinay-hinay nga nahanaw ang iyang mga shows, ug "At Home Ka Dito" na lang ang nahibilin, walay rason nga dili siya makapaabot. Karon pa, nga nagkaduol na siya sa tumoy sa kalampusan sanglit miabot ang Wowowee nga wala lang niya damha? Busa kinsay nasayod nga pipila ka adlaw gikan karon, momata na lang si Roxanne nga dunay tanyag nga teleserye ug leading man niya ang iyang lain pa niyang gitamod nga si Jericho Rosales?