Aga mag-presidente

Nahinabi sa PangMasa si Aga Muhlach niadtong Lunes sa hapon sa may swimming pool sa The Bellevue Hotel sa Alabang, human niyang mag-taping para sa trivia sa 4th Golden Screen Awards sa Entertainment Press Society, Inc. (Enpress), nga kabahin sa stellar acting career sa 10 of the most glamorous and talented actresses sa Philippine Cinema.

Niadtong mga orasa, bag-o pa lang nadawat sa PangMasa ang balitang dayon na ang pagkandidato ni Lipa City Mayor Vilma Santos isip Governor sa Batangas.

"Sa 2009, kakandidato akong President ng Pilipinas," matud pa ni Aga. "Siguro naman tama na iyong dalawang taon na mag-isip ako kung tutuloy ako o hindi. Saka hindi na ako mangangampanya, sasabihin ko na lamang sa kanila na alam ko na ang mga problema ng bansa, kaya kung gusto nilang lunasan ko iyon, iboto nila ako. Kaya itong mga taga-Bellevue, kayo ang mga unang boboto sa akin."

Tataw nga komedya ra kini ni Aga sanglit 2010 pa man ang sunod nga piniliay. Giklaro hinoon niya nga wala siyay laraw nga magpapili karong tuiga sanglit priority niya ang iyang pamilya ug career.

Suma pa nga slim na karon si Aga, ug komedya pa niya maikog siya nga magpasagad sa iyang lawas tungod kay duha ka mga slim nga babaye ang kauban niya sa latest project, sila si Maricel Soriano ug Angelica Panganiban, ug matud niya nakatunga na sila sa ilang shooting.

Sa Marso 19 o sa Marso 25 siya magsugod og taping sa sitcom nga idirek gihapon ni Danny Caparas. Aduna pa siyay duha ka movie offer, usa sa Star Cinema kauban si Bea Alonzo ug usa sa Viva Films kauban si Anne Curtis.

MSKM wala pay klaro nga ending

Nahinabi sa PangMasa si Bea Alonzo pagkahuman sa premiere showing sa "Happy Hearts" diin gisuportahan niya ang best friend niyang si Shaina Magdayao ug ang kalove-team niini nga si Rayver Cruz.

Karon na ang opening sa pelikula nga ubos sa direksyon ni Joel Lamangan ug matud pod ni Bea, gikilig siya og maayo nilang Shaina ug Rayver ug klaro gyud nga magustuhan kini sa mga fans sa duha.

Gikumusta sa PangMasa ngadto kang Bea kung kanus-a matapos ang "Maging Sino Ka Man," apan tubag niya nagsige sila og extend kay wala gihapon mahusay ang pag-resolve sa role ni Christopher de Leon nga importante sa istorya, busa wala pa kini ending.

Binoang sa PangMasa ngadto kang Bea, basin huwaton pa nilang matapos ang eleksyon, kay mokandidato man og pagka-Vice-Governor sa Batangas si Boyet, usa pa nila tapuson ang ilang teleserye. "Baka rin", binoang pod nga tubag ni Bea, kay wala pa gisulti ngadto kanila kung kanus-a gyud sila matapos.