Karong buwana gisaulog nato ang International Women’s Month, usa ka paagi paghatag ug pagtahod sa tanang mga babayeng naningkamot mapalambo ang ilang kinabuhi, mapanindot ang dagan sa ilang pamilya, nanikay-sikay alang sa paghatag og mga katumanan sa mga damgo ug tinguha. Mga babayeng ang tingusbawan wala malubong sa pagkahunlak panagsa sa ilang mga tagsa-tagsa ka kalibotan gumikan sa mga pagsulay. Ug labaw sa tanan mga babayeng nagpakabana sa mga kalamboan sa ilang palibot. Upat kanila mga solid nga magdadayeg sa Bisrock. Angayan nga sila karon ang motikang dinhi sa Fan Zone – ang mga babayeng klarong astig ug fayter.
Si Aileen Unabia Panoy ug iyang inahan, retired teacher Teofila Traya Unabia-Panoy nga mga lumolupyo sa Upper Tawog, Valladolid, Carcar nag-una sa listahan sa Bisrock enthusiasts. Nag-una sa pagkamahiligon si Mama Fel ug napahid kining maong impluwensya ngadto kang Ai-Ai nga panatiko nang daan sa mga Bisdak musicians bisan pa’s panahon sa Brown Underground Soundz. Ang 26-anyos nga si Ai-Ai mao ang founder sa Deadspotters Society Youth Organization, usa sa mga pundok nga nagpaluyo sa mga kalihokan may kalabotan ang Bisrock. Natawo si Ai-Ai niadtong Septiyembre 2, 1980 sa Media, Argao Cebu sa magtiayong Manuel "Dodz" Panoy ug Fel. Kinamanghoran sa tulo ka magsoon. Salutatorian sa Valladolid Elementary School sa tuig 1993, ug salutatorian sa Madridejos National High School sa Madridejos, Alegria niadtong 1997. Didto siya unang nagkolehiyo sa San Nicolas College sa Surigao City, Surigao del Norte. Gipadayon niya ang pagtoon may kalabotan ang Edukasyon, major in Mathematics diha sa University of the Visayas. Kabahin sa iyang mga paningkamot ang pagsulod og nagkalain-laing trabaho aron makatabang sa ginikanan. Gikan sa Mayo 2003 hangtod Agosto 2003, nahimo siyang kahera sa California Bar and Restaurant. Sa Nobyembre 2003 hangtod Mayo 2004, nahimong head waitress sa Cebu Italian Pizza Connection. Ug gikan niadtong Hunyo 2004 taman sa kasamtangan, staff siya sa East.West Café sa Ayala branch.
"Natukod nako ang Deadspotters Society tungod sa akong kagustohan nga mosuporta sa mga bandang lokal. Sahi ra sad kon ako’y magkinahanglan og suporta, nindot kon naa sa’y mopaluyo sa akong mga kalihokan. Damgo sad nako nga duna’y banda. Nindot gyud duna’y mopaluyo sa imong mga paningkamot," niya pa.
Dakong impluwensya alang kang Ai-Ai ang pagkahingantahon sa iyang inahan nga kanhi magtutudlo. Natawo niadtong Pebrero 29, 1936, natapos ni Ma’m Fel ang elementarya sa Carcar Central School. Ug ang high school sa University of the Visayas. Dugay niyang natapos ang iyang kurso tungod kay nagtrabaho pa siya’g gabii aron makatigom. Buot niyang magkinaugalingon aron makatabang sa pamilya, busa nisulod usa siya og trabaho sa usa ka pabrika. Tungod kay hilig naman niya ang pagkanta, ilabi na ang mga Sugbuanong mga huni ug awit, dayag na lang nga nakasimba ning maong interes ang iyang kinamanghorang anak nga mao si Ai-Ai. Gani, matag lakaw ni Ai-Ai balik sa dakbayan alang sa iyang trabaho magpina si Ma’m Fel nga ipabilin ang iyang mga CDs ug uban pang compilation sa mga Bisrock nga kanta kay iyang paminawon.
"Gitagaan na nako siya’g kopya sa mga lyrics para makasabay siya sa mga kanta," pamahayag ni Ai-Ai. "Hilig kaayo na siya’g Bisaya nga kanta. Maskin pa kaniadto, mokanta na siya kay mao man na iyang hobby/interest, mga Binisaya gyud na iyang tirada."
Runs in the family kuno ang pagkamahiligon nila sa musika. Gani, apo ni Mama Fel ang pamosong singer/composer nga Sugbuanon nga si Jaime Salazar, pagsugilon pa ni Ai-Ai.
Samtang, si Leonor Daganasol Lamberte ug iyang inahan nga si Norma mahiligon usab sa Bisrock. Si Leonor nga mas nailhan sa pundok sa Deadspotters isip Linx.Emo.Chick natawo niadtong April 26, 1988 sa Martha Maternity Hospital sa Pasay City. Apan nagtubo nga Bisdak. Kasamtangang nanimuyo sa Hi-way, Ibabao, Mambaling. Natapos niya ang iyang elementarya sa Mambaling Elementary School, ang high school sa University of the Visayas, ug nasugdan ang pagtunob sa kolehiyo sa University of San Jose-Recoletos. Interesado siya sa nagkalain-laing natad sa arte – musika ug balak. Ingon man mahiligon usab siya magpakisayod sa mga current events. Hilig niya ang guitar strumming, pag-compose og mga kanta, pagdibuho, pagtagik og mga balak, pagsayaw ug pagkanta.
Samtang ang iyang 39-anyos nga inahan nga si Norma mao usab ang mga interes. Gani dili supak ang iyang inahan sa nahitabo karong mga kalamboan sa Bisrock, labi na ang sunod-sunod nga mga gigs nga gitambongan hapit tanan ni Linx.
"Maminaw sad siya og Bisrock bisan ang iyang mga type nga music kay kanang kang Sharon Cuneta. Dili man siya against sa music or concerts. Pagkakaron, kami tanan ni-appreciate man gyud sa Bisrock. Ang dili lang gyud niya ma-take kanang kadlawon na mouli gikan nitan-aw sa mga gigs," pamahayag ni Linx.
Bugsay…Bugsay Message Corkboard
Greet lang ko sa Basak Kainsong, Lapu-Lapu nila Fremon, Jason, Vincent, Bogoy, Ongge, Junren ug ni Badat ug Wanito. – From Archie. Request lang ko’g "Agay"
Greet lang q sa aq bestfriend na c leah rapada, hi pud q sa bandang Black Market. Nila Jude, Cordz, Franz, ug sa akong kalipay sa BBC nga si Nudz – From Kilatz
Greet lang ko sa tanang members sa SIC. Nilang Jay-r West James, Nayl Princess, ug uban pa.
Please lang ko’g burak sa tanan DSS especially ni Bhadz. Then ni paring, brando, adriane, sa aqng mga bb. C alyn, linx, frivehn, aika, ug please request ko’g Langit na Kanako by Crazy Goblinz. Thanks. – From Marione
Greet lang q xa mga SSDO band taga basak kainsong lapu2x, nila ni imot, jason, vincent og ni lene. Request ta ko’g Narsing.
Greet ko sa akong mga anak nga napusgayan sa gugma nila. – Caroline aka Mamichaka