Giangkon pod ni Licaros nga pangandoy pod niya nga mamahimong responsabli ug bililhon nga binuhat sa katilingban. Giklaro pod niya nga kun palapdan gayud ang pagpaambit sa edukasyon alang sa tanan, daghan pang angay buhaton sa educational system sa nasud aron pagpanday og maayong kaugmaon.
Isip Law student karon sa UP Diliman, matud ni Licaros nga public service gyud ang bokasyon nga iyang sudlan ugma damlag tungod kay ganahan siya nga mougmad og kumunidad ug makighugoy-hugoy sa tanang tawo. Ang mao unyang bokasyon sigurado nga may kalabutan sa pamalaod. Giangkon pod niya nga wala niya wad-a ang posibilidad nga motrabaho sa Office of the Solicitor General ug sa Supreme Court, kun dili man gani sa Public Attorney's Office, o sa Non Government Organization. Kining tanan buhaton niya aron pagbayad sa mga magbubuwis nga maoy naggasto niya isip "iskolar ng bayan."
Matud niya nga mapasigarbohon kaayo siya sa sistema sa UP busa iyang ipakita sa tanan nga ang buwis nga ilang gibayad sa kagamhanan wala mausik o makawang diha sa ilang paggasto sa ilang pagtuon, buot niya nga makabaton og pagtoo ang mga tawo diha sa kagamhanan ug nga ang gobyerno makahimo paghatag og kaayuhan kun magtinabangay ang tanan.