"Diskarte Queen sa PBB, taga Cebu?

Dako ang pagtuo sa Banat Hugyaw, nga taga Cebu ang gipasabot nga "Diskarte Queen" sa teaser sa Pinoy Big Brother season, kinsa usa sa walo ka housemates nga wala pa ipaila.

Siya walay lain kundili si Dionne Monsanto, kinsa kanhi kabahin sa Sabado na Gyud Ngiga Gud sa ABS-CBN ug nakalugwa pod sa pipila ka episodes sa 'For Life."

Si Monsanto tinun-an sa UP-Cebu sa kursong Mass Communications ug partime model ingon man events organizer. Mga nagpakaila ni Dionne positibo pod nga siya maoy gipasabot sa teaser.

Si Monsanto usa sa mga local models kansang istorya sa kinabuhi napatik na dinhi sa Banat Hugyaw niadtong milabay nga tuig ug positibo nga "diskarte queen" gyud siya sanglit naniguro siya nga makatrabaho samtang nagtungha.

Samtang kusog karon ang hagawhaw sa gay circle nga apil pod sa PBB season two ang kanhi pambato sa UP Maroons nga si Bruce Quebral kinsa nisalmot kaniadto sa UAAP representing University of the Philippines. Siya pod ang representante sa Pilipinas sa Manhunt International in 2002.

Ang tinubdan sa Banat Hugyaw miingon nga si Quebral ang gipasabot sa teaser nga "Basketball Hunk" kinsa gipasagdan na lang sa iyang mga teammates human siya na-injury.

Kahinumduman nga mibukas na ang mas dako ug mas nindot nga "Bahay ni Kuya" niadtong Domingo sa gabii apan sa 14 ka mga housemates gikan sa tibuok suok sa kalibutan unom lang ang gipaila ug matud pa sa umaabot nga Domingo pa isunod ang walo.

Sila mao si Ezekiel, "Australian hottie" nga may "pusong Pinoy," ex-PDA finalist ug commercial model nga si Wendy nga gipaila isip "hot commercial babe," ang nursing graduating student nga si Nel a.k.a. "Mr. Perfect," si Saicy, nga giingong "Samba Dance Diva," si Gee-Ann nga maoy "Cheering Chick," ug ang half-Austrian, half-Pinoy nga si Mickey nga matud pa "Hip Hop Dancing King," sa Switzerland.

Ang walo nga wala pa ipaila gihulagway nga sila si Basketball Hunk, Diskarte Queen, Lovable Sweetheart, Prodigal Son, Good Son, ug Sassy Girl.