Dili makagradwar si Dagul

Kay nag-una man ko didto sa Neo Neo Grill sa Juan Luna, (kanhi San Jose dela Montana) sa atbang sa Carmelite, ug nag-una man pod pag-abot ang upat ka artista sa "Goin Bulilit" nakauna ko sa pagpangutana sa upat nga maoy gipili nga mokanta sa bag-ong educational tape nga gipaluyohan gihapon sa Jollibee. Pero kay daghan na man nga nanggawas kalabot ani, ang mga tubag sa mga child wonders nga wa ikasuwat sa ubang mga writers maoy akong hisgotan sama pananglit sa butang nga dunay labot sa pag-announce nila nga nanawat na sad sila'g mga bag-ong mga sakop or member.

Ako silang gipangutana kon magdugang ba sila, O duna bay mo-graduate ug unsay age limit sa usa ka talented nga bata aron mahimong kauban nila sa maong top-rating Sunday afternoon show? Matud pa ni John, l2 ang age limit, ug dili na dawaton ang sobra sa 12 ang edad ug kinahanglang mo-graduate na gyod ang kauban nila nga moabot sa edad nga 12. Usa sad kini sa hinungdan matud pa nganong nagpatawag sila'g mga aplikante, gawas nga dungagan sad gyod nila ang ilang mga kauban.

Unya unsa may mahitabo ni Dagul nga milapas na man gayud sa 12 ang panuigon? Misagbat si Nash nga dili maka-graduate si Dagul bisa'g tiguwang na. Nangutana ko'g ngano, mitubag si Sharmayn nga, nagkatawa, "ka polpol man si Dagul, pirmeng repeater…" Hinoon, nasayod kong nagkomedya si Sharmayn, ug nasayod kong dili tangtangon si Dagul. Nangutana sad kog nganong maayo silang magbinayot, pero inay motubag, gibinayotan na lang ko ug mikatawa na lang sad ko.