Deadspotters Society may gasa'ng dugo

Una sa tanan, mga pahasubo sa banay'ng Bollozos diha sa Minglanilla kansang anak nga si Rutchel Bollozos, 17 anyos, nadisgrasya niadtong Sabado. Si Rutchel usa sa mga haligi sa Deadspotters Society sa Minglanilla chapter, kini mao ang paglarawan kaniya sa iyang kauban nga gihinganlan og Linx nga sayo kaayong mi-text nako sa maong impormasyon.

Ang haya ni Rutchel ana-a karon sa ilang panimalay sa Lower Tiber, Minglanilla. Alang niadtong buot mohatag sa ilang "last respects" sa mingtaliwan, palihug og coordinate sa numero nga akong itala sa ubos tupad sa pangalan sa founder sa Deadspotters Society, usa sa mga aktibong pundok nga nagsuporta sa Bisaya rock music.

Niadtong Valentine's Day, dugo ang gasa sa duha ka sakop sa Deadspotters Society. Duha lamang kanila ang nakapasar sa gipahigayong bloodletting activity nga gipasiugdahan sa The FREEMAN Foundation inabagan sa Regional Blood Coordinating Council nga gipangulohan ni Roger Mariano, Jr. Kauban ni Roger sa pagpahigayon sa bloodletting ang uban pang volunteers nga sila'ng Dr. Jon Mark Verga, Neil Tan, Randall Angob, Ma. Eden Eralez, Jeniline Mirafuentes ug Shirley Lequido.

Pinaagi sa usa ka panawagan sa The FREEMAN public service section ug sa tulumanong "BisrocKabataan" sa 93.1 Smash FM, nisanong ang Deadspotters Society - Inayawan, V. Rama, Sawang Calero ug Talisay chapters sa pag-una ni Aileen "Ai-Ai" Panoy nga maoy founder sa Deadspotters Society. Natukod ang maong pundok niadtong June 16, 2006 isip pagtamod sa nagkakusog na niadtong panahona nga genre sa musika - ang Bisaya rock. Nagsugod nga kinomedya lang ang maong sugyot tali nilang tulo ni Ai-Ai, DJ Ram Dizon ug Charlton "Tonton" Miparanum, ang gitarista sa Phylum sa dihang nagkapundok sila sa gialagarang establisamento ni Ai-Ai.

Kini mao ang East-West sa Ayala Center-Cebu. Gusto nilang aduna'y tingog sa Bisrock sa mga lugar nga "dead spot" kon wala'y signal. Imposible tinood nga madunggan ang usa ka matang sa musika sa mga lugar nga wala'y signal, apan nahimong posible ang pagkahimugso sa Deadspotters Society kon DSS.

Balik sa blood donation, ang nakadonar og dugo mao sila'ng Mark William "Imong" Salvador nga maoy DSS Inayawan chapter president ug nibarog isip tigpamaba sa pundok, ug si Neil Seno nga nakuhaan og tagsa ka bag nga dugo kada usa (500 cc matag bag).

Si Neil Seno sakop sa Sawang-Calero chapter. Ang uban pang mga sakop nga mapasalamaton ang Foundation tungod kay bisan pa man og nabalibaran tungod kay underage which means nagkinahanglan pa'g parent's consent ug ang uban mga underweight, mipakita og dakong kasibot alang sa maong kalihokan. Sila mao si Oshin Gabico ug Gian Sibonga (Inayawan chapter), Alyn Castañeda nga babayeng bahista sa Bisrock band "Late Weekend" kauban si Steffi Jane "Yenyen" Dacua, ug Glysdi Jane Flor sa Sawang Calero chapter, ug si Kenneth Binarao sa Talisay chapter.

Labing unang proyekto sa Deadspotters ang concert for a cause alang sa usa ka Nursing graduate sa Cebu Normal University nga nagsagubang sa balatiang leukemia. Apan bisan pa man sa mga paningkamot nga makatigom og pundo alang sa chemotherapy sa 21-anyos nga pasyente, mitaliwan si Karlaisle Mae Anog. Ikaduhang labing lig-ong proyekto sa pundok ang nahitabong Bisrock Rakrakan sa Sawang Calero tungod kay dili lalim ang preparasyon sa pag-organisar og kalihokan alang sa paglingaw sa mga Bisrockers. Gilarawan nga malamposon ang maong pagpahigayon sa rakrakan ug gikahimuot kini pag-ayo sa ilang overall president nga si Gil "Choy" Truya.

"Ang among greatest achievement kay mo-claim gyud mi nga kami ang pinakadaghan og members nga society nga nisuporta sa Bisrock. Nya klaro among suporta kay di gyud mawagtangan og DSS members kada gig, and then dili sama sa uban nga pangguba ug pagkini-at ki-at ang tirada. Kaming mga liders permi mi ga-remind sa among mga sakop mahitungod ana," pamahayag sa founder nga si Ai-Ai (09197874407).

Niining mga gutloa, giplano sa pundok ang usa ka revision sa mga rules and regulations ug upcoming activities alang sa pundok. Apan ipahigayon kining tanan human na sa pagbilar nila kang Rutchel.

Magtudlo kuno sila og mga bag-ong mga pangulo mata'g chapter labi na sa gibiyaang pwesto ni Rutchel ug may reelection sa overall officers kay bakante na man karon ang pwesto sa overall president. Niining nahitabo karon ni Rutchel nga mas gitawag nila sa anggang Papa Rutch, dili makita ang mga sakop sa pundok sa umaabot nga "Bisrock to the Max" sa Millennium Park (ilawom sa Marcelo Fernan bridge), Lapu-Lapu City karong Pebrero 24. Usa kini ka konsiyerto nga maghatag og dakong pagtahod sa kontribusyon ni novelty icon Max Surban sa natad sa novelty music dinhi sa Sugbu ug uban pang parte sa Kabisay-an ug Mindanao.

Ang maong konsiyerto mahitabo pinaagi sa paningkamot sa Sangguniang Kabataan sa barangay Pusok inabagan sa barangay council ug sa pakig-alayon sa Junior Philippine Institute of Accountants-5th years, ug Junior Financial Executives sa University of San Carlos. Usa usab kini ka matawag og tigi sa katakos sa mga banda.

"The competition featuring 17 of today's most promising Bisrock bands will promote independent new bands and inspire the youth in their interest in music. It would also be an avenue for the youth to express their artistic talents. It is also a tribute concert to one of the leading artists in the Visayan music industry, Max Surban," matud pa sa SK chairman sa Pusok nga si Hon. Mhealler Ycong ug Anne Lalaine Chua, fund raising committee chairman sa USC-JFINEX.

Wala pa hinoon matino kon pagatambongan ba kini ni Max Surban.

Matawagan si Mhealler sa 09162787934 alang sa dugang impormasyon o kaha email sa [email protected].