Mr. World Philippines 2007, lbabing taas, labing ambongan sa tanan

Ang moreno ug labing taas nga kandidato nga si Emmanuel Mago maoy napili nga Mr. World Philippines 2007 atol sa pageant finals niadtong February 17, 2007 sa 'Walang Tulugan" ni Kuya Germs sa GMA-7. Ang 6'3 nga si Mago maoy pambato sa Pilipinas alang sa Mr. World 2007 adto sa Sanya China karong March 31, 2007 (dili September), diin 50 ka mga ambongan pod nga mga lalaki gikan sa nagkadaiyang nasud ang iyang matigi.

Si Mago mas naila isip "Coach Bhobby" sa iyang mga higala ug mga sakop sa junior basketball team sa Emilio Aguinaldo College, diin siya nagkuha sa kursong BS Management degree. "I love training kids because I see a lot of enthusiasm and potential in them," pong pa niya atol sa preliminary interview. Pangandoy niya nga mamahimong professional basketball coach ugma damlag.

Ang first runner-up mao si Jason Fulgencio, ug second runner-up si Jean Claude Bocquet. Ang beterano nga model nga si Iago Raterta maoy napiling Mr. Physique ug Mr. Energy awards, samtang ang paborito sa kadaghanan sugod pa sa pre-pagent nga si Peiman Gomari maoy Mr. Photogenic award.

Ang 6'1 nga si Fulgencio ilado na nga dagway sanglit daghan na siya og nahimong print and television commercials. Bag-o pa lamang siya mitapos sa kursong BS ECE sa Mapua Institute ug pangandoy niya nga mamahimong banggiitan nga engineer ugma damlag. Samtang ang Fil-French nga si Bocquet "painting and composing RNB and love songs" ang forte. Naglaom siya nga makabaton og kaugalingong negosyo ug mamahimong record producer.

Daghan ang nagpaabot nga masulod sa Top 3 si Raterta apan nagtoo ang kadaghanan nga ang kontrobersya nga iyang giatubang pipila ka adlaw sa wala pa ang pageant maoy nakaingon nganong wala siya masulod bisan sa Top 10. Nasayran nga daghan ang mi-question nganong apil si Raterta sa mga kandidato nga unta siya man ang pambato sa Pilipinas sa Manhunt International 2006. Apan pong pa sa mga organizers nga mahimo ra nga moapil ang maong beterano nga commercial, print ug television model tungod kay igo ra man siya nga gipili aron maoy ipadala sa maong indigay sa milabay nga tuig ug wala gayud moagi og pageant.