Archie Uy: Kanta ra'y sikat sa Aggressive Audio

Haller there mga Banatero ug Banatera! Hapit nang Valentine's Day, kumusta ang inyong mga pugakhang, inyo na bang giandam alang sa pagpalinya puhon sa maapil sa ipang-firing squad? Nyahahahhahaa!

Sabagay, kadtong mga way ka-date anang adlawa nga ihawon ang bakang way swerte (i-delata ug ikarne-norte pa gyud!), ang atong lindog padayong magtamod sa diwa sa gugma busa atangi gyud ninyo ang atong Valentine Day special kay tribute na sa dili ninyo matarog nga pagsunod ning maong lindog - kamo ang akong Valentino ug Valentina - ang mga certified Banatero ug Banatera.

Manay Judith Sue, touched kaayo ko sa gihimong pagtunol niadtong Enero 26 sa P15,000 nga natigom atol sa Sinulog Bisrock Rakrakan ngadto sa Boy Scouts of the Philippines nga gipangunahan ni BSP-Cebu Council Hernando Streegan ug ni BSP executive officer Buenaventura Romeo. Natigom kining maong pundo atol sa Enero 18 nga rakrakan. Sa ingon nga paagi nakatampo kita'g hinabang/donasyon ngadto sa BSP-Cebu council nga maoy beneficiary sa maong konsiyertong gipaluyohan sa maayong kabubut-on sa Globe Telecom ug LBC Hari ng Padala.

Sa susamang kalamboan, may ipahigayon na usab nga konsiyerto karong Pebrero 9 sa Handuraw Events Café nga may kalambigitan ang buhat sa kalooy apan sa Biyernes nga edisyon na kini sa Banat Hugyaw nako ipasabot o palapdan. Basta atangi ang rakrakan sa 15 ka mga banda nga nisanong sa panawagan sa mga organizers niini nga silang UP-Cebu student councilors Marinel Velmonte ug Genry Christian Gabayan. Suportahan na sad nato kining maong katuyoan nga gipamarayeg sa among managing editor Nimrod Quiñones nga alumnus sa UP.

And now, on to our main topic, sweet kaayo ang managhinigugmaay nga silang Archie Uy, gitarista sa Aggressive Audio nga milayat gyud gikan sa Tinipong Bansa sa Amerika aron ipadayon ang iyang pagbanda-banda nga napadaplin niya sa hamubong panahon tungod sa pag-immigrate sa iyang pamilya sa US. Dala ang mga bag-ong ekipo kon kahimanan sa pagpanukar, giatiman ni Archie ang mga engagements o mga commitments nga gipangtanyag ug nasanongan sa banda niining mga events organizers sa nagkalain-laing bahin sa Kabisay-an ug Mindanao. Si Ysai Perez mao ang nibarog nga manager sa grupo ug nahimong "inahan ug lakip na ang pagka-yaya" ngadto sa mga sakop sa Aggressive Audio sa dihang wala dinhi sa Sugbo si Archie.

Hugot ang pagtoo ni Archie nga may kaayohan ra'ng mapupo ang ilang mga paningkamot nga nagsukad niadtong sila "Teenage Chaos" pa. Iya kining gisaysay sa iyang pagtikang isip dinapit sa tulumanong "BisrocKabataan" sa 93.1 Smash FM nga manganaw-kanaw matag Lunes, Miyerkules ug Biyernes sa buntag. Gitino ni Archie nga angkonon nilang sikat na ang mga kanta sa Aggressive Audio apan wala pa gyud mahitabo nga nidako ang ilang mga ulo sa pagpangangkon nga sikat na sila.

"Sa tanang nasakitan sa among mga kanta o kaha nahilasan namo, I will take this opportunity to ask for an apology from you kay dili gyud na namo tuyo nga duna'y masakitan sa among mga kanta o kaha sa among mga lihok. Labaw pa nga wala mi mangangkon nga sikat na mi. Hasta gani kami nahibulong nga kon moadto mi sa usa ka lugar, familiar ang crowd sa among mga kanta. Pero sa kanta ra ha? Namo wala sila kaila," pagpasabot ni Archie.

Tinuod oi mga katagibalangay. Humot kaayo ang "Senior Citizen" maskin gani pag-uli nako sa lugar sa akong inahan - sa Gigaquit, Surigao del Norte. Tiaw mo na'y maskin Mamanwa (kana bang lumad sa amo-a), miikid man sa bibong tuno sa ilang gianggaan og "Ang Tiguwang". Ug maskin ang akong paryente nga bata nagsige og kanta-kanta bahala'g nagkayuring. Napadalhan gyud nako'g CD (hepz orig gyud ha dili pirated, pero nakapalit gyud sila'g pirated nga akong gipasunog hee hee). Giilisdan nako'g "Pwerteng Lingina" CD nga naa pa'y autograph sa mga sakop sa Aggressive Audio nga silang Eugene Corpin on mic, whistle, acoustic guitar; Joel Ablanque on drums, back-up vox; Vincent Ngalis on bass guitar, back-up vocals; ug Sidney Alburo on vox, acoustic, percussion. Si Randolf Silvano maoy kapuling electric guitarist ug back-up vocals ni Archie sa didto pa ang naawahi sa gawas sa nasod.

Speaking of Sidney, diha bitaw to'y fwen sad si Sidney nga nanglood man siguro to kay ni-email man gyud nako ug miingon nga "hilas na si Sidney." Gipasabot ni Archie nga daghan na gyud nabag-o sa ilang skedyul labi na karon nga nag-atiman na sila's recording sa ilang ikaduhang album after sa "Pwerteng Lingina" (kadtong album nga ang hapin may hulagway sa dinagkotang kandila nga makaduka kon tutokan) gawas sa ilang mga stints with Manila-based bands, mao nga duna'y mga panahon nga dili na makaatiman siguro si Sidney. Pero that doesn't mean nakalimot na daw sila kay dili man gyud na mawala ang diwa sa panaghinigalaay. Nanawagan siya nga sabton lang daw kuno sila karong mga panahona nga daghan sila'g giatiman o gihuna-huna.

Lakip niining mosamot makapa-busy sa Aggressive Audio ang laraw ni Archie nga dunay mahitabong repackaging sa ilang lain pang mga patok nga kanta para "malimpyo ug mahapsay ang ubang mga bahin niini."

"Para sad ma-improve namo ang kalidad sa among recording. Among paningkamotan nga di mi mauwawan ug dili sad magmahay ang mo-purchase sa among album," panapos ni Archie.