Mga bisita sa nangaging kalihukan

Sa una pa gyong semana sa Disyembre sa miaging tuig, may nanuktok sa akong malapalasyong tahanan ug sa pag-abli nako, misugat sa akong mga mata ang duha ka polis, sila si PO3 Alvin dela Cerna ug PO1 Lara, medyo kulbag gamay kay nahibulong kog unsay tuyo, kay sayon ba gud kon anhaon kag polis nga wa ka makaila? Pero kay wa man sad koy sala nga nahimo, gamay ra sad ang kakulba. Nangutana si PO3 Alvin de la Cerna kon ako bay Kriss Relatado, mitando dayon ko ug miingon sad dayon siya nga anak siya ni Natividad Relatado Lainggo nga naminyo sa usa ka dela Cerna ug ang iyang kauban nga si PO1 Lara, kauban sad kono niyang polis gikan sa Davao City nga gipadala dinhi alang sa ASEAN Summit. Pastilan, medyo nahuwasan ko'g gamay kay anak diay sa akong ig-agaw nga taga Malita, sa lalawigan sa Davao apan naa na sa Davao City magpuyo, duol ra sad sa uban nakong mga pag-umangkon nga mga Relatado ug mga Lainggo [sama atong mikalit lang sad og tunga sa amo nga nanghatag og mga salaping pilipinhon nga si Toto Lainggo nga may mga bowling lanes, restaurant ug pawnshop sa Ecoland sa Davao City].

Nanuroy mi, nag-pictorial sa nagkalain laing tourist spots ug gidaa nako sa Parola sa Liloan nga usa sa mga tourist spots sa Liloan diin ang agianan, makita pod ang balayng karaan nilang Pilar Pilapil ug ang Suba O Lilo nga usa pod ka tourist spot paingon sa barangay Catarman diin mahimutang ang Parola, diin, didto pod mi mag-shooting niadtong tungora.

Sa reunion sa pagpasko, mitambong sad ang usa sa among benefactors, si Mr. Tom Keys nga pila na ka tuig ang nakalabay, pasahero lang sa taxi nga ang driver mao si anhing Danny, nga tungod kono kay honest driver si anhing Danny, na-impress siya, ug sugod ato, kada anhi niya sa Pilipinas, may dala gyong mga valuables alang sa pamilya, gawas sa dollars. Gihatagan kong Tom og usa ka baga kaayong libro about film making ug istorya sa usa ka film maker nga si John Ford, pero hangtod ron, wa pa gyod ko katunga sa pagbasa.