Miss Mandaue 'pasok' sa Bb. Pilipinas

Dako ang potensyal ni Margaret Wilson nga makabaton og beauty title pero matud pa ni Manay Lolit Solis ang tambag sa mga bayot mao nga kinahanglang tan-awon niini ang iyang pamanit.

Suma pa nga ang mga nakakita ni Margaret sa screening sa Bb. Pilipinas nakabantay nga wala magpareho ang kolor sa panit niini, dunay bahin nga puti ug duna usay morena.

Matud pa dili usab hamis ang likod niini busa kinahanglan nga mokunsulta siya og espesyalista.

Si Ailyn Luna usab nga apil sa Bb. Pilipinas Contest, kinahanglan nga mag-diet. Matud ni Manay Lolit angayan usab makadaog og titulo ni Ailyn tungod kay na-carjack ang iyang sakyanan tungod kay nakadlawnan siya sa final screening niadtong Sabado.

Samtang ang Miss Mandaue 2006 nga si Nicole Schimitz usa usab sa palaran nga nasulod sa final screening alang sa Bb. Pilipinas. Siya ang bugtong taga Cebu nga apil sa maong indigay karong tuiga.

Suma pa ni Bb. Pilipinas Anna Maris Igpit si Nicole usa sa mga taas og grado atol sa final screening ug dako ang tsansa nga masulod sa top five.

Tsika ni Igpit sa Banat Hugyaw, usa lang si Nicole sa duha ka mga taga-Cebu nga iyang gi-train alang sa Bb. Pilipinas. Ang usa nahagba atol sa final screening.