English ni Luis, sayop

Gisaway ang Iningles ni Luis Alandy sa iyang paglugwa sa S-Files niadtong Domingo aron mangayo og pasaylo ni Kat Alano nga iyang giangkon nga usa sa mga babaye sa showbiz nga iyang nakauban sa kama.

Ang linya ni Luis, " I ask for your apology!" nga kun sabton daw si Kat pahinoon ang angayang mangayo og pasaylo.

Ang sakto nga linya matud ni Manay Lolit Solis, " I ask for your forgiveness ."

Dungan niini humana ang fifteen minute fame ni Luis tungod kay matud ni Manay Lolit, si Jake Roxas na usab ang giistoryahan karon human siya mi-guest sa radio show ni DJ Mo kagahapon.

Gidayeg si Jake bisan og walay kwenta ang uban niyang mga tubag, wala gyud niya ibutyag kinsa ang mga babaye nga nakauban na niya og tagay sa kalibutanong kalipay.

Talent ni Manay Lolit Solis si Jake niadto apan miangkon ang beteranang kolumnista nga wala niya kini masinati og maayo.

"Nababalitaan ko na lang ang madalas na pagpunta niya noon sa Cebu City pero nagde-deny siya kapag tinatanong ko. Mahiwaga debah?

Liposuction ang sekreto ni Katrina

Kumpirmado gyud nga nagpaliposuction si Katrina Halili. Mismong si Dra Vicky Belo ang mitino niini ngadto sa mga tigbalita ning bag-o lang.

Pwes matud ni Manay Lolit Solis, mutuo na siya sa pralala ni Katrina nga wala retokiha ang lawas niini sa pictorial sa FHM.

Si Katrina ang "sexiest woman" sa Pilipinas base usab sa survey sa FHM Magazine. Nalupig niya si Angel Locsin nga maoy naggunit sa maong titulo niadtong 2005.

Si Katrina produkto sa first batch sa Starstruck reality based artista search sa GMA-7 ug usa karon sa labing inilog nga young stars sa industriya kun projects ang hisgutan.