Hunong, pahiluna ug paminaw sa Station Avenue

Station Avenue. Kini dili ngalan sa dalan kun dili sa usa ka banda nga nagsugod na og tuyhakaw diha sa nagkadako nga wanang sa Bisrock community. Natukod niadtong miaging 2004, ang ilang kanhi pangulo nga naila lamang nga "Roger" maoy nagpursigi kanila nga magtukod og banda. Human sa hamubong higayon, nanamilit si Roger kanila, hinungdan nga nangita sila og hulip niini.

Nasayran nga dili diay Station Avenue ang unang ngalan sa ilang banda kundili "RoadsBreak," diin nadapit na usab sila sa mga nagkadaiyang kalingawan ilabi na sa mga pista.

Ang grupo gilangkuban nila ni Wilson Arcilla (vox),Raphael Gumban(drums), Lyndon Espinosa (lead guitar), Rodelo Amahan (bass guitar).

Sa dihang mibiya si Roger miabot usab si Joseph Cisneros nga mao karon ilang rhythm guitarist. Siya estudyante sa Cebu Institute of Technology sa kurso nga Electronics Communication Engineering ug nag-alagad usab isip service crew sa usa ka foodchain.

Suod na sila nga managhigala, gani hulagway pa nila mura na sila og manag-uyab nga kanunay magkuyog ug maglalis usab ginagmay.Sa college kaniadto dili tiaw ang ilang sakripisyo aron lamang magtakdo ang ilang mga oras, Hinoon napangita ra og lusot ang maong ginagmay nga mga suliran. Dinhi niining higayona sila midesisyon nga ilisan ang ngalan nga "RoadsBreak" sanglit daw sama kini og ngalan sa bakery paminawon.

Pwes diin maggikan ang ngalan nga Station Avenue?

"Sa magazine ra man na nako nakit-an, usa na siya ka tindahan didto sa gawas niya kay nindot man paminawon sa dunggan mao na nga giuyonan sa tanan nga Station Avenue na lang bag-ong ngalan sa maong banda," butyag ni Wilson.

Pagkakaron ang grupo duna nay 10 ka orihinal nga kanta nga kasagaran nga komposisyon si Wilson, tulo niini gipatukar na sa 93.1 Smash FM ug ang most requested song mao ang "Pinangga," nga pahinungod sa tagsuwat ngadto sa iyang hinigugma. Matud ni Wilson kini nagmatuod lang unsa kadako ang iyang gugma ngadto sa binuhat nga mibihag sa iyang kasingkasing karon.

Ang unang gig sa grupo nga nagtangag na sa ngalan nga Station Avenue nahitabo niadtong Nobiyembre 14 diha sa Handuraw Events Café diin nakauban nila ang Indephums, Missing Filemon, Yield ug uban pang banda nga nag-una kanila sa duyan.

"Naka dungog lang mi ngadto kang DJ RAM sa dihang iyang gi-announce nga pwede makatukar sa Handuraw, mao na nga misuway mi og adto unya nagpalista mi didto," sugilon pa ni Lyndon

Sugod niadto nagsunod-sunod na ang ilang gigs dinhi sa dakbayan sa Sugbo ug bisan pa man nga walay bayad, misugot lang gihapon sila aron dunay exposure.

Apan giisip nila nga labing makasaysayanon nga nahitabo sa ilang banda mao kadtong ceremonial switching sa Christmas lights diha sa Fuente niadtong milabay nga buwan diin usa sila sa mga dinapit nga performers.

"Proud mi nga nakasabay mi sa ubang Bisrockers nga mga inila dinhi sa Cebu, kay wala man gyud mi magdahom nga maabot na namo bisan og naglisod-lisod mi karon,"matod pa ni Raphael

Ang Station Avenue usa ka grupo nga naninguha gyud nga mainila dinhi sa dakbayan sa Sugbo, ug bisan paman og dunay nasinati nga kakuwang sa pondo, wala kini nila isipang babag sa ilang pangandoy.

"Sa tinuod lang, naglisod baya mi karon kay taga tukar namo manghulam man gyud mi og instrumento kay wala man gyud mi among instrumento, unya usahay manghulam pa gyud mi og gadgets pabaga ug nawong," saysay usab nila ni Wilson, Lyndon ug Raphael.

Pagkakaron padayon silang naningkamot ug nakigbisog nga makab-ot ang ilang pangandoy nga mahimong usa sa labing mga tinamod nga Bisrock band karon sa Sugbu. Sayod sila nga inubanan sa sakripisyo ug disiplina mahangop ra nila ang pedestal nga buot nilang istaran pag-abot sa tukmang panahon.