27TH Cebu Pop: 'Bakho' nga nagmadaugon

Ang kanta nga nagbugtaw sa ka-walay kalooy sa usa ka inahan paglaglag sa binhi gikan sa iyang sabakan nga giawit sa usa ka 11-anyos nga batang babaye maoy migawas nga mananaug sa 27th Cebu Popular Music Festival diha sa Cebu Coliseum, Biyernes sa gabii. Tugob sa kamatuoran ug pangindahay, ang kanta giuluhan og "Bakho sa Anghel," ug gihatagan og kahulugan ni Geneviv Abuloc, lumad nga taga Sagbayan Bohol ug 2nd runner- up sa Little Big Star Cebu edition sa ABS-CBN.

Ang kadaugan ni Abuloc naghatud og laing dungog sa composer nga si Gwendolyn Suico Cresencio, nga sa milabay'ng tuig usa usab sa pwersa nga nagpaluyo sa grand prize winner sa 26th Cebu Pop, "Tatay Pauli Na." Ning tuiga, kauban ni Cresencio nga mitagik sa "Bakho sa Anghel" si Frederick Villarojo.

Suma pa ni Cresencio ngadto sa Banat Hugyaw, ang mga balita matag adlaw diin yano ra nga gipakuha sa mga inahan ang ilang gisabak maoy nakapadasig niya pagsuwat sa maong kanta, pamasin nga sa iyang simple nga paagi makapadayag siya og mensahe unsa ka bililhon ang kinabuhi.

Makahuluganon usab ang bisti nga gisul-ob ni Abuloc, puti ug nagbutang siya og puti nga mga buwak palibot sa iyang ulo, daw anghel. Mitulo ang iyang mga luha dihang gitawag na ang iyang ngalan.

Dali niyang gigakos ang iyang mga composers.

"Wala gyud ko magdahom nga makadaog kay mga expert ang mga mag-aawit. Daghan og nindot nga mikanta. Ang akong pagkanta ako lang gi-feel aron ma-klaro pag-deliver sa mensahe sa akong giawit," matud pa ni Abuloc sa dihang nahinabi sa Banat News-Hugyaw.

"Tan-awa ang panganod," ang paboritong linya ni Abuloc sa maong kanta tungod kay matud pa niya dinhi gipakita nga ang mga bata nga gipakuha, naghandum nga makakita sa kanindot sa kalibutan. Mensahe niya ngadto sa mga inahan "ayaw ninyo ipa-abort ang inyong gisabak kay sila dunay katungod nga mabuhi dinhi ning kalibuta, sila gasa sa Diyos."

Giasoy ni Abuloc nga three years old pa lamang siya dihang nagsugod siya og kanta, diin ang una niyang nakat-onan mao ang "Aray" ug "My Heart Will Go On." Si Sarah Geronimo ang iyang idolo ug sama sa naulahi buot usab siya mamahimong "professional singer" ugma damlag.

Ang mga taga-ABS-CBN Cebu maoy mipaila ni Abuloc ngadto ni Cresencio, hinungdan nga siya maoy nahimong interpreter.

Ang "Sugbuanon Ako" maoy nahimong second placer ug Best Interpreter ang nagkanta niini nga si Robert Bernadas. Sinuwat ni Norms Tomada, mensahe sa maong awit mao nga awit nga bisan asang suok sa kalibutan ang pagka-Pilipino ilabi na nga isip Sugbuanon mopakita gayud sa iyang maayong labok ug mosidlak ang talento diha sa kakugi sa pagpanarbaho.

Samtang ang "Kalandrakas" ang nahimong third placer nga ginama ni Norman Jabonero, kabahin kini sa usa ka damgo ug pangandoy sa kalinaw ug panaghiusa sa tanan. Naghisgot usab kabahin sa nagkalandrakas nga panghitabo sa atong katilingban apan nanghinaot si Jabonero nga mag-kalandrakas ang tanan nga maoy mohatod ngadto sa dalan sa kaayohan.

Ang "Kalan-drakas" giawit sa mga sakop sa pundok nga gitawag og "Nagkadaiya" nga silang Charles Jayme, Arven Pretilla, Glenn Tambayayoy, Jay-R Librando ug Martin Jabonero.

Samtang ang "Lihok sa Kabataan" nga giawit ni Sandy Rhey Gomez maoy nahimong texter's choice. Kini ginama ni Jun Alino Cabillar. Ang maong awit nagpahimangno sa mga bata nga naungo sa video games ug Internet games nga nadaot ang pagtuon ug kaugmaon.

Ang unang ganti sa maong pasundayag nakakuha og P150,000; P100,000 sa second prize samtang P50,000 ang ika-tulong ganti. Ang consolation prizes nakadawat og P15, 000.

Mas nahimong mabulokon ang Cebu Pop nga gihatud gihapon sa Cebu Arts Foundation Inc., gumikan sa performances sa "Cebu Divas" nga sila si Eva Santos, Rizza Navales ug Maria Donna. Mikanta usab ang laing garbo sa Sugbu nga si Jimmy Marquez samtang milingaw usab si Roselle Nava pinaagi sa duha niya ka mga kanta.