Pinoy ang kasingkasing ni Miss Universe

Maanyag ug makabibihag gawas nga dunay hait nga salabutan. Kini mao ang mga hiyas ni Miss Universe 2005 Natalie Glebova. Russian-Canadian si Natalie, apan kun imo na siyang hinabion imong matugkad nga duna siya'y koneksyon sa kulturang Pilipinhon. Kini maoy iyang gitug-an sa one-on-one interview niya sa The Freeman Entertainment niadtong Miyerkules.

Nasayran nga sa dihang mibalhin sila didto sa Canada gikan sa Russia, ang ilang pamilya didto nanimuyo sa usa ka kumonidad diin daghan ang mga Pilipino. " I grew up in a very multi-racial neighborhood and I studied in a multi-racial school, and my friends were mostly Filipinos, who told me about your country," asoy ni Natalie.

Gani matud pa niya ang iyang unang crush, Filipino.

Si Natalie dinhi sa Sugbu aron ipagya ang kaayuhan sa iyang giduso karon nga produkto, ang nabantog nga Singha Beer sa nasud sa Thailand. Matud pa sa mga kadagkuan sa Singha, si Natalie ang ilang gipili sanglit bisan og langyaw siya, paborito niyang kan-on ang Thai food. Atol sa presscon ni Glebova didto sa Krua Thai, Banilad Town Center, gipamatud-an niya nga ni-uyon siya nga mahimong brand ambassador sa Sing company, ang tiggama sa Singha beer. Ang numero unong rason sa pagbisita ni Natalie mao ang paglig-on sa panaghigalaay sa Thailand ug Pilipinas.

Ug kun bahin sa iyang lovelife, "I'm single but not anymore available. Yes, I am seeing somebody right now. And yes he's a Thai," angkon ni Glebova. Ug wala niya gisulti ang pangalan sa lalaking nakaangkon sa iyang kasing-kasing.

Apan dali niyang giklaro nga dili ang iyang uyab maoy rason nganong atua na siya nagbase sa Thailand. Gitin-aw niya nga dugay na siya nga nagsige og byahe sa maong nasud, sanglit nakita ang kanindot sa Thailand ug ang maayong gawi sa mga lumulupyo niini. Kini maoy iyang nadiskubrehan niadtong didto sa Thailand gipahigayon ang Miss Universe 2005.

Didto karon sa maong nasud aduna nay kaugalingong kompanya si Glebova, ang Glebova International. Aduna siyay nahimong libro karon entitled "Healthy, happy, beautiful" nga nagsaysay sa iyang mga kasinatian sa Miss Universe 2005 pageant. Naa pod siyay line of products, food supplements, skin care and spa products.

Tulo ra man tuod siya ka adlaw dinhi sa Sugbu apan daghan siya'g dili malimtan nga kasinatian - milingkod isip hurado sa Miss Cebu 2007, miuban ni First Lady Margot Osmeña diha sa Parian Drop-in Center ug nakighimamat sa sakop sa Cebu press ug mga importanteng tawo sa dakbayan.

Unsay tambag niya sa mga naglaom nga mosunod sa iyang tunob isip Miss Universe? Matud niya ang labing importante alang sa usa ka kandidata mao nga "dili sila overly rehearsed" kun dili natural lang. Gidugang niya nga kinahanglan usab nga masabtan nila unsay tumong sa ilang pagsalmot ug unsa nga kasinatian ang ilang buot mahuptan. "In my case I wanted to learn something out of it, and then made sure that I made the best out of it."